Отбасы құндылығы артқан сайын қоғамдағы бірліктің нығая түсері анық. Еліміздің бас қаласының демографиялық өсімінде де жыл сайын оң көрсеткіш байқалады. Ынтымағымыздың ұйытқысы болып отырған бақытымызды бағалай түсу үшін Астана қаласының Жастар саясаты мәселелері басқармасы дәстүрлі түрде «Отбасы – бақыт мекені» атты кешенді жобаны сәтімен ұйымдастыруда. Жобада отбасылық марафон; жас отбасыларға, жүкті әйелдерге және ата-ана болуды жоспарлап отырған жас жұбайларға арналған семинар-тренингтер; колледждер мен жоғары оқу орындарының студенттеріне арналған сыныптан тыс іс-шаралар; бейнебайқаулар; фотосуреттер байқаулары бар.
Елордалық жас отбасыларға арналған «Үздік жас отбасы» жалпықалалық байқауы осы жылдың 24 қазанында басталған-ды. Бір айға созылған байқау қорытындысы Астана қаласындағы Қазақстан Қарулы Күштерінің Әскери-тарихи мұражайында өтті.
Байқау ережесіне сәйкес, қатысушы отбасылар үздіктер қатарынан табылу үшін «Неліктен бұл байқауда жеңіске жетуіміз керек?» тақырыбында бейне визитка жазса, ал финалистер Instagram желісінде лүпілдер және пікірлер саны бойынша анықталды. Байқауға 53 отбасы қатысқанымен, финалға тек 10-ы жолдама алды.
Жастар саясаты мәселелері басқармасының басшысы Қайрат Қамбаровтың айтуынша, жас отбасыларды қолдау – жастар саясаты саласының негізгі міндеттерінің бірі. Осы бағытта «Отбасы – бақыт мекені» іс-шаралар кешені елордада бірнеше жыл қатарынан ұйымдастырылып келеді. Осы уақытқа дейін жүгіру марафоны, семинар тренингтер, түрлі байқаулар өткізілді.
«Бұл байқауға барлығы мыңнан аса жас отбасы қатысып жатыр. Дәл 1 ай бұрын өтінімдер қабылдау басталған еді. Солардың ішінен финалға тек 10 отбасы шығып отыр. Елордамыздың жас отбасыларын осындай байқауларға қатысуға шақырамын. Сайыс болғаннан кейін жеңгені де, жеңілгені де болады. Барлығы лайықты, қазылар алқасына оңай болмайтыны анық», деді Қ.Қамбаров.
Сонымен, байқау нәтижесі белгілі болып, жеңімпаздарға тұрмыстық техника мен электроника сатып алуға арналған ақшалай сертификаттар берілді. Атап айтқанда, 1-орын алған Сембековтар отбасы (Қазыбек Сембеков, Ақерке Тілеубекова) – 500 мың теңге, 2-орын алған Балабековтер отбасы (Бағлан Балабеков, Аруна Ниязбек) – 350 мың теңге және 3-орын алған Боташевтар отбасы (Арман Боташев, Айғаным Боташ) 250 мың теңгенің сертификатымен марапатталды.
Бұған қоса байқау финалына өткен қатысушылардың барлығы марапатсыз қалмады. Яғни қалған 7 отбасы да 100 мың теңгеден жұбаныш сыйлығына ие болды.
Аталған байқау әр отбасындағы қарым-қатынасты нығайтуға, балалар мен ата-аналарды жақындастыруға ғана емес, сондай-ақ кішкентайларды саламатты өмір салтына баулуға және қоғамға бейімдеуге ықпал етеді.
«Қуанышымызда шек жоқ. Біз үшін өміріміздегі ерекше сәт болды. Отбасымыз төрт адамнан тұрады. Мен – әскери қызметкермін, жұбайым балабақшада бала тәрбиесімен айналысады. Ұлымыз – мемлекеттік балабақша тәрбиеленушісі. Қызымыз – үйде ата-апасының қолқанаты. Біздің отау құрғанымызға 5 жыл болды. Алғаш үй болған сәттен талай қиыншылық пен қуанышта бір-бірімізге арқа сүйеп, өніп-өсіп келеміз. Жұбайымыз екеуміздің де туып өскен жеріміз – Абай облысының Абай ауданындағы Архат ауылы. Мектеп кезінен басталған махаббатымыз отбасын құрумен жалғасты. Бағымызды сынап көрген бүгінгі сайыста ата-аналарымыздың қолдауын жақсы сезіндік. Сайыстың жас отбасыларға берген дүниесі мол болды» деп ақжарма тілегін білдірді, жеңімпаз болған отбасының отағасы Қазыбек Сембеков.
Байқау финалында эстрададағы белгілі жұп Қыдырәлі мен Қарақат әнмен шашу шашса, street workout қозғалысының негізін қалаушы Айтым Жакупов, журналист Айкерім Есенәлі, М.Горький атындағы Мемлекеттік орыс драма театрының директоры Ернар Жұматаев, «Мөлдір Мұқанованың өнер-білім орталығының» негізін қалаушы Мөлдір Мұқанова және медиаменеджер, продюсер Алпамыс Шаримов және тағы басқалар жас отбасыларға ерекше қолдау білдірді.
