АҚШ-тың екі үлкен концерт залында қазақ музыкасы ойналады

АСТАНА. 2 маусым. АҚШ-тың екі үлкен концерт залында қазақ музыкасы салтанат құрады. Бұл туралы Қазақстанның АҚШ-тағы елшілігіне сілтеме жасаған egemen.kz тілшісі хабарлады. Аталмыш елшілік өкілі Нұрғали Арыстановтың айтуынша, 30 маусымда Нью-Йоркте, 3 шілдеде Вашингтонда (Колумбия округі) Қазақстанның ең шебер музыканттары америкалықтарға қазақтың көне аспаптарының көмегімен ғасырлар қойнауынан жеткен дала сазын таныстыратын болады. Тыңдаушылар көне Жібек Жолының тарамдарынан талып жеткен, қазақ музыка өнерінің құдіретін танып, Құрманғазы атындағы  мемлекеттік академиялық халық аспаптар оркестрі  мен Байқадамов атындағы хор капелла орындаған шығармаларға қол соғатын болады. Концерттерде қазақтың классикалық шығармаларымен қатар, әлемдік классиканың өлмес туындылары көрерменге ұсынылатын болады. Анар Төлеуханқызы. Дереккөз: egemen.kz. Фото: trend.az.