Депутаттар қылмыстық жолмен алынған кірістерді заңдастыруға, терроризмді қаржыландыруға және жаппай қырып-жою қаруын таратуға қарсы іс-қимыл саласындағы халықаралық стандарттарды үйлестіру мен олардың орындалуына бақылау жүргізу тетіктерін енгізуге бағытталған заң жобаларын әзірлеу мен оларды іске асырудағы тәжірибелерімен басқа елдерден келген әріптестермен бөлісті.
Сенатор С.Мәкежанов іс-шара барысында еліміздің заңнамасын жетілдіру тәжірибесімен, атап айтқанда, соңғы жылдардағы ұлттық заңнамаға енгізілген негізгі түзетулермен таныстырды.
«Біз Әділетті Қазақстан құрып жатырмыз. Реформалардың маңызды мақсаты – ұлттық табысты әділ бөлуді қамтамасыз ету. Мемлекет басшысы Қасым-Жомарт Тоқаев бизнес өкілдерімен, халықпен кездесу кезінде заңсыз алынған капиталды мемлекетке қайтарып, оларды азаматтардың мүддесіне пайдалану керектігін бірнеше рет айтқан болатын», деді С.Мәкежанов.
Сенатор Қазақстан Парламенті қабырғасында осы саладағы заңнаманы жетілдіру жұмыстары белсенді жүріп жатқанын да атап өтті. Парламент биыл жазда қылмыстық жолмен алынған кірістерді заңдастыруға және терроризмді қаржыландыруға қарсы іс-қимыл туралы заңдарды қабылдады.
«Қазақстан сындарлы әрі салиқалы саясат жүргізіп келеді. Біз қазіргі жағдайда кірістерді жылыстатуға қарсы тұру мәселесін жекелеген елдердің жеке дара ұлттық проблемасы емес ойлаймыз. Осыған байланысты бізге халықаралық ұйымдардың неғұрлым белсенді қатысуы және шынайы ынтымақтастығы қажет», деді сенатор С.Мәкежанов.
