Мемлекет басшысы ант қабылдағаннан кейін алдағы жоспарларды нақты тізбектеп берді. Әсіресе алғашқы Жарлықтың ауылдың әлеуетін арттырумен байланысты болғаны көпшіліктің көңілінен шықты. Шыны керек, еліміздегі қордаланған мәселелердің басым бөлігі ауылдық жерлерде. Ауылдардың дамуына жағдай жасау – мемлекеттік саясаттың аса маңызды стратегиялық мақсаттарының бірі. Ауыл тұрғындарының өмір сүру сапасы мен әл-ауқатын жақсарту және ауылдардың инфрақұрылымын дамыту – маңызды іс. Мемлекет басшысы өз сөзінде: «Осы құжат арқылы Үкіметке ауылды дамытудың 5 жылға арналған нақты жоспарын әзірлеуді тапсырамын. Бұл менің жаңа президенттік мерзімдегі бірінші Жарлығым болады. Үкімет ауылды дамытуға арналған барлық жобаны жүйелі түрде реттеп, жинақтауға тиіс. Содан кейін мақсатты түрде тиімді жұмыс жүргіземіз», деді. Яғни алдағы бес жылда ауылдардың ажары артып, тұрғындардың тұрмыс сапасы жоғары болады деген сенім мол. Соңғы жылдары «Ауыл – ел бесігі» бағдарламасы шеңберінде тәуелсіздік алған жылдардан бері жөндеу көрмеген ауылға кіреберіс жолдарға асфальт төселіп, тұрғындар мәре-сәре күй кешіп жатқаны рас. Қала берді, ауылдағы әлеуметтік ғимараттар жаңартылып, жаңа нысандар салынып, игі істер жалғасын тауып жатыр. Мемлекет басшысының Жарлығынан кейін бұл бағыттағы жұмыстар жаңаша қарқын алып, ауылдар көркейе түсетініне сенімдімін.
Әлемдік саясат алмағайып күй кешіп тұрған кезеңде жаңа реформалармен халықтың әл-ауқатын жақсартуға талпыну оңай шаруа емес. Мұндай сәтте елдің бірлігі, ынтымағы аса маңызды. «Бір жағадан бас, бір жеңнен қол» шығарып, елдің ертеңіне нық сеніммен қарап, Мемлекет басшысының саясатын қолдау арқылы болашағымызды баянды етуге мүмкіндік зор.
Жарқынбек АМАНТАЙ,
Павлодар облыстық мәслихатының депутаты
