Президент: «Халқымның сенімі – маған аманат», деді. Ендеше, біз үшін де Мемлекет басшысының сенімі аманат болып, оған қиянат жасамауымыз керек. Қалайша?! Қасым-Жомарт Кемелұлының қол қойған жарлықтарын, бастамаларын бұлжытпай орындап, адалдық танытсақ, сол – біздің аманатымыз.
Кезінде талай нәрсені көрдік. Жаңадан ашылған зауыттар лентасы қиылып, ашылу рәсімі әдемі өткізілген соң ертесіне жабылып қалып жатты. Міне, осындай көзбояушылықтан арылатын уақыт жетті. Ондай алдауды, қулықты ел экономикасы енді көтермейді.
Бір-бірімізге тілектес болып, жанашырлықпен қабылданған бағдарлама, жоспарларды орындамасақ, құжат сол қағаз күйінде тағы да қалып қояды. Алысқа бармай-ақ қасымыздағы көршіміз Өзбекстанға қарайықшы. Техника атаулының бәрін шығарып жатыр. Ұшаққа дейін жасайды. Біздің неге қолымыздан келмейді ендеше?! Әрине, келеді. Бұл жерде елімізге керегі тек адалдық пен әділдік. Президент сол үшін де әділетті қоғам, экономика, мемлекет деп кешегі ұлықтау рәсімінде босқа айтқан жоқ.
Марат СЕЙДАХМЕТОВ,
экономика ғылымдарының кандидаты, доцент
Шымкент
