Прокуратурадағы байқау

Бүгінде Мемлекет басшысының мемле­кеттік тілді дамыту және оның рөлін арттыру, қазақ тілін белсенді түрде үйрену, сондай-ақ, күнделікті қызметте қолдану үшін қызметкерлердің қызығушылығын арттыру жөніндегі саясат жүзеге асырылып келеді. Бұған еліміздің прокуратура органдары да қомақты үлес қосып отыр. Мәселен, жуырда про­кура­тура органдары қызметкерлерінің арасында «Мемлекеттік қызметте – мемле­кеттік тілмен» атты республикалық байқау өтті. Байқауға Бас прокуратураның Құқықтық статис­тика және арнайы есепке алу жөніндегі комитеті, Астана, Алматы қалаларының прокуратуралары, Бас әскери прокуратура, Бас көлік прокуратурасы және облыстық прокуратуралардың өкілдерінен құралған 19 команда қатысты. Бас Прокурордың орынбасары Жақып Асанов өзінің құттықтау сөзінде атап өткендей, мемлекеттік тілдің қызмет етуі мем­лекеттік саясаттың маңызды бағыт­тарының бірі болып табылады. Сондықтан байқауды өткізудің басты мақсаты  мемле­кеттің тіл саясатын қолдау, прокуратура органдарындағы қазақ тілінің қолданылу аясын кеңейту және насихаттау болып табылады. Әрбір команда мемлекеттік тілді білу мен оны өзінің күнделікті кәсіби қызметінде қолдану деңгейін көрсетті. Байқауға қатысушылар әртүрлі қыз­меттік жағдайлардағы ауызша сөйлеу шебер­ліктерімен жарысып, қызметтік құжаттарды әзірлеу, оларды сапалы аудару дағдыларын көрсетті. Сондай-ақ, әділқазылар сот проце­сіндегі мемлекеттік айыптаушының рөліндегі прокурор шешендігінің сапасы мен мәдениетін бағалады. Құрамына Президент Әкімшілігінің, Жоғарғы Соттың, Мәдениет, Әділет ми­нистр­ліктерінің өкілдері, Парламент депутаттары, Бас прокура­тураның қызметкерлері, прокуратура ор­гандарының ардагерлері енген қазылар алқасы байқаудың нәтижелерін бағалады. Байқау қорытындысы бойынша жеңім­паздар бағалы сыйлықтармен марапатталды. Александр ТАСБОЛАТОВ, «Егемен Қазақстан».