Депутаттар арнайы құрылған жедел штабта төтенше жағдайдың жай-жапсарын талқылады. Штаб жұмысына облыс басшылығының, барлық техникалық қызметтің, энергетикалық кәсіпорындардың және Энергетика министрлігінің өкілдері қатысты.
Мәжіліс депутаты Артур Платонов бүгінде гуманитарлық көмекті жеткізу жұмысы белсенді жүріп жатқанын атап өтті.
«Партия тұрғындарға көмек көрсету ісіне белсенді атсалысып жатыр. Мобильді бригадалардың құрамындағы қоғам белсенділері үй-үйді аралап жүр. Жалғыз тұрып жатқан зейнеткерлер, ерекше қажеттілігі бар азаматтар, мұқтаж отбасылар туралы ақпарат жиналуда», деді ол.
Осы күні депутаттар қала тұрғындары үшін жылыту пункті орналасқан №36 мектепке барды. Қалада дәл осындай 12 пункт ашылды. Сондай-ақ халық қалаулылары Екібастұздағы қалалық ауруханаға барды. Қазіргі уақытта мұнда 240 емделуші бар.
«Терапия және педиатрия бөлімшелерінің жұмысымен таныстым. Аурухана штаттық режімде жұмыс істеп жатыр. Жоспарлы және жедел жеткізілген емделушілерді қабылдайды», деді Мәжіліс депутаты Айгүл Нұркина.
Мәжіліс депутаты Ерлан Саиров кінәлі адамдарды жауапқа тарту мәселесі туралы ойын білдірді. «Еліміздің энергетикалық активтеріне аудит жүргізу қажет. Түскен қаржыны жаңғыртуға емес, өз қалтасына салған азаматтар заң алдында жауапқа тартылуы қажет», деп атап өтті Ерлан Саиров. Ал Мәжіліс депутаты Вера Ким Екібастұзда азаматтарға көмек көрсету үшін «Жастар Рухы» жастар қанатының волонтерлер штабы жұмыс істеп жатқанын жеткізді.
Екібастұзда апаттық-қалпына келтіру жұмысы жалғасып жатыр.
