Алматы өңірлік қаржы орталығына айналады

Кеше Орталық коммуникациялар қызметінде Ұлттық банк төрағасы Қайрат Келімбетов баспасөз мәслихатын өткізді. Онда Алматыда өңірлік қаржы орталығын құру және оның жұмыс істеу мәселелері туралы айтылды. Бұйыртса, 2020 жылға дей­ін Алматы қаласындағы қар­жы орталығын дамыту тұ­жы­рымдамасы биылғы жыл­дың соңына дейін қабылданбақ екен. Ол жөнінде брифингте Ұлттық банк төрағасы айтты. «Алматыда қаржы орталығын құру бастамасы, осы уақытқа дейін тиістi деңгейде дамы­тылған жоқ болатын. Десем де, Мемлекет басшысының тап­сырмасымен бүгін Үкiмет Ұлт­тық банкпен бiрге бұл бағытта бiрқатар нақты шешiмдердi кең талқылап, қабылдады. Нәтижесінде, қаржы орта­лығының 2020 жылға дейiнгi даму тұжырымдамасы толы­ғымен қайта қаралады. Енді бұл құжат ағымдағы жылдың желтоқсан айына дейiн қа­был­данатын болады», дедi Қ.Келiмбетов. Аталған құжатты әзiрлеуге барлық мемлекеттiк органдары тартылыпты. Сондай-ақ, бұл іске Еуропа қайта құру және даму банкi, Азия даму банкi, Дүниежүзiлiк банк пен Ислам даму банкiнiң мамандары да жұмылдырылыпты. Ендігіде қаржы орталықтарының даму саласының жетекшi мамандары да бұл жұмысқа қатыспақ ниетте екен. «Таяуда Астана экономикалық форумы аясында Үкiмет Ислам даму банкiмен 2 млрд. АҚШ доллары көлемiнде инвестиция тарту туралы келiскен болатын. Сол келiсiм аясында Ұлттық банк пен Ислам даму банкi арасында кездесулер өттi. Кездесуде Алматыны Орталық Азиядағы Ислам даму банкiнiң аймақтық хабына айналдыруды келiстiк», дейдi Қ.Келiмбетов. Ұлттық банк Қазақстанда ислам қаржыландыру мамандарын даярлауға бел буып, қаржы бөлмек екен. Әуелгіде ислам қаржыландыруы бойынша әлемдiк деңгейдегi 50-ге жуық адамды даярлауды жоспарлап қойыпты. Нұрбай ЕЛМҰРАТОВ, «Егемен Қазақстан».