«Әрбір жас азамат мемлекет ісіне, ел ісіне араласуы керек. Мемлекет басшысы айтып өткендей, жас қазақстандықтар үнемі жетіліп, жан-жақты дамып отыруға тиіс. Саяси жаңғырту ісін жалғастыру және кәсіби мемлекеттік басқаруды енгізу үшін тиісті кадрларды даярлау қажет. Жалпы, еліміздің қоғамдық-саяси өміріндегі жастардың рөлін күшейту – «Amanat» партиясының негізгі басымдықтарының бірі болып саналады», деді ол.
Қазақстанның барлық өңірінен конкурстық негізде 50 қатысушы іріктелді. Олар 5 күндік белсенді оқыту курсынан өтеді. Бұл – көпшілік алдында сөз сөйлеу, саяси коммуникация, жобаларды басқару, көшбасшылық бойынша тренингтер, сондай-ақ Қазақстанның қазіргі саяси құрылымы туралы дәрістер.
«Оқыту блогынан бөлек, бағдарламада белгілі саясат және қоғам қайраткерлерімен, ғалымдармен, Парламент депутаттарымен кездесулер қарастырылған. Қатысушылар ел дамуына ерекше үлес қосуға ұмтылады. Іріктелген 50 адам мансабын жоғарылатуға және әділетті Қазақстан құруға жол ашатын өз дағдысын, білімі мен құзыретін дамыта алатынына сенімдімін», деді партияның Саяси менеджмент академиясының директоры Данияр Мұқитанов.
