Жасыратыны жоқ, Польша – осы әлем чемпионатының плей-офф кезеңіне шыққан ең әлсіз құраманың бірі. Турнирдің топтық кезеңінде Сауд Арабиясын 2:0 есебімен жеңіп, Мексикамен тең ойнаған (0:0) Польша футболшылары төрт ұпаймен әрең дегенде 1/8 финалға жолдама алды. Дәлірегі, қақпашы Войцех Шченснидің жеке шеберлігі арқасында плей-оффта ойнау бақытына ие болды. 30 жастағы «Ювентус» клубының қақпашысы топтық кезеңдегі үш матчта 16 сейв жасап, екі матчта қақпасына бірде-бір гол өткізген жоқ. Тіпті Месси мен Ад-Довсаридің пенальтиден тепкен добын қайтара білді. Футболда барлық матчтың тағдырын бір футболшы шешетін болса, онда Аргентина кейінгі төрт әлем чемпионатында кубоктан үй тұрғызатын еді.
Кешегі матчта да Роберт Левандовски бастаған Польша жігіттері өте нашар ойын көрсетті. 90 минут бойы Уго Льорис қорғаған қақпаға небәрі үш мәрте дәл соққы жасай алды. Тек ойынның соңғы минутында ғана Левандовскидің бір пенальтиді екі рет теуіп, екіншісінде әрең гол салғанын айтпағанда.
Ал Франция болса, қатарынан екі дүркін әлем чемпионы атану мақсатында тағы бір маңызды қадам жасады. Бірінші таймдағы Оливье Жирудің голы мен екінші таймдағы Килиан Мбаппенің дублі Францияға жеңіс сыйлады – 3:1. Биылғы чемпионаттағы бесінші голын соққан Килиан сұрмергендер көшінде 5 голмен жеке-дара көш бастады.
Франция мен Польша футболшылары әлем чемпионаттарының тарихында осымен екінші рет кездесті. Ең алғаш 1982 жылы Испанияда өткен әлем біріншілігінің үшінші орын үшін өткен матчында жолығып, сол жолы польшалықтар 3:2 есебімен басым түскен болатын. Арада 40 жыл өткенде француздар Польшадан есе қайтарды.
Плей-оффтың төртінші матчында Сенегалды сенімді түрде жеңген Англия ширек финалда Францияға қарсылас атанды. Топтық кезеңдегі екі ойында қарсыластарын ірі есеппен (Англия – Иран 6:2, Англия – Уэльс 3:0) тізе бүктірген ағылшындар бұл жолы да африкалықтардың қақпасына жауапсыз үш гол соқты. Кездесудің 35-минутында Джордан Хендерсон Беллингемнің пасынан кейін матчтың есебін ашса, бірінші тайм аяқталар тұста капитан Харри Кейн есепті 2:0-ге жеткізді. Кейннің алаңдағы негізгі жұмысы гол соғу болса да, ол осы чемпионаттағы төртінші матчында алғашқы голын соқты. Шабуылға қарағанда жартылай қорғаныста сауатты өнер көрсететін Кейн әріптестеріне гол соғатын мүмкіндік тудырып бергенді құп көретін футболшы.
Кейінгі төрт матчта ағылшындардың ойынынан мынадай бір ерекшелікті байқадық. Яғни олар кез келген матчтың есебін бірінші болып ашады да, екінші голын да жылдам соғуға тырысады. Сенегалмен өткен матчта да солай істеді. Кездесудің екінші таймында Сака ағылшындардың үшінші голын соқты – 3:0.
Сөйтіп, 10 желтоқсанға жоспарланған ширек финалда бір-біріне лайықты қарсылас – Франция мен Англия құрамалары кездеседі. Дәл осы финалға бергісіз матч биылғы чемпионның кім болатынын анықтап беруі де ғажап емес.
