Бірінші болып 125 балл жинады

2 маусымда өткен Ұлттық бірыңғай тестілеудің бірінші күнінің қорытындысы бойынша Алматы көш бастап тұр. Мұндағы  физика-математика пәндерін тереңдете оқытатын №178 лицей түлегі, «Алтын белгі» үміткері Айға­ным Әбдіжаппар  Ұлттық тестілеу орталығы таратқан ақпарат бойынша  ең жоғары көрсеткіш – 125 балды ие­ленді.  2012 жылдың 1 желтоқсанында – Қазақстан Республикасының Тұңғыш Президенті күніне орай ашылған лицейдің директоры, «Құрмет» орденінің иегері Әбдімәжит Өтеш: «Биылғы оқу жылында осы білім ұясын бітірген 109 түлектің ішінде 22 халықаралық ғылыми жобалар жарыстарының, халықаралық конкурстардың қатысушылары мен жеңімпаздары, 21 «Алтын белгі» иегері, 15 ерекше үлгідегі аттестат иегерлері өздеріне артқан сенімді ақтай білді. Мектептің ҰБТ қорытындысы бойынша орта балл 105,8 болды», – деді. Тест тапсырушылардың арасында алғашқы болып «Алтын бел­гісін» ең жоғары баллмен аяқ­таған А.Әбдіжаппарды құт­тықтап, бірнеше сауал қойдық. – ҰБТ сұрақтары қиын болды ма? – Әртүрлі, күрделі де, қара­пайым да сұрақтар болды. – Таңдаған пәнің? – География – Қай пәнге көп уақыт кетті? – Математикаға – Болашақта кім болғың келеді? – Қаржы саласының маманы болсам деймін. – Шетелге оқуға барасың ба? – Жоқ. Қазақстан универ­ситет­терінде-ақ білім алғым келеді. – 125 балл алғаныңа таңғалдың ба? – Қалай десем екен... Мен өзіме өзім сенімді болдым. Өйткені, ал­дын ала өткен сынақтарда жоға­ры көрсеткішке қол жеткізіп жүргенмін. – Білім алған мектебіңе риза шығарсың? – Иә, біздің лицей физика-математика пәндерін тереңдете оқытады ғой. Осында оқимын деген үміткерлер өте көп. Айнаш ЕСАЛИ, «Егемен Қазақстан». АЛМАТЫ.