Мал ұрлығының алдын алып, жолын кесу, ұрыларды анықтап, қылмыстық жауапкершілікке тартуды мақсат тұтқан жедел іс-шараға облыстық полиция департаментінің жеке құрамы жұмылдырылды.
Департаменттің барлық қызмет салаларымен бірлесе бекітілген жоспарға сай жүргізілген жұмыс нәтижесінде полицейлер екі күнде 14 деректі әшкереледі. Оның ішінде өткен жылдары жасалған қылмыстар да бар. Жедел жұмыстардың нәтижесінде «малым қолды болды» деп арызданған кей тұрғынның жоғалтқаны жайылымнан табылып, 14 қылмыстық іс өндірістен тоқтатылды.
Ұрланған және жоғалған 20 бас мал табылып, иелеріне қолхатпен қайтарылды. Әрине, ұрлықты анықтау – полицейлердің міндеті. Бірақ иесі де малына қырағы болғаны жөн-ақ. Әйтпесе, «айдай салдан аз өлді, көре салдан көп өлдінің» жыры жуырда таусылмайды. Біз әлі ұқыптыны ұры алмайтынына мән бермей келеміз.
Жедел іс-шара кезінде барлық аудандар мен облыс орталығында мал және ет өнімін тасымалдау фактілерін анықтап, ет сататын базарлар мен орындарды тексеретін мобильдік топтар жұмыс істеп, мал және ет тасымалдаған 410 автокөлік, ет өнімдерін сататын 166 орын, 100 фермерлік шаруашылық тексерілді.
Қызылорда облысы
