Әдебиет • 07 Желтоқсан, 2022

«Айбоз» дарабоздары анықталды

93 рет көрсетілді

Мәдениет және спорт министрлігі биыл тұңғыш рет шығармашыл жандарға арналған «Айбоз» ұлттық әдеби сый­лығын жариялаған еді. Жалпы жүлде қоры 35 млн теңгені құрайтын ауқымды байқаудан үміттілер көп болды. Десек те бақ шаба ма, бап шаба ма?..

Жеті аталым бойынша беріле­тін әдеби сыйлыққа бар­лығы 402 өтінім келіп түскен. Оның ішінде қазылар алқасының таңдауымен 49 шығарма (әр аталым бойынша 7 шығармадан) ақтық кезеңге өтті. Бүгін, міне, бірнеше айға созылған дүбір­лі дода мәресіне жетіп, жеңім­паздары анықталды.

Сонымен «Үздік поэзия» номинациясы бойынша «Жұмбақ арал» поэмасымен «Egemen Qazaqstan» газетінің қызметкері Батырхан Сәрсенхан, «Үздік проза» аталымында «Тырнақ» әңгімесімен Айгүл Кемелбаева, «Үздік драматургия» номинациясы бойынша «Мың мен жалғыз...» пьесасымен Талғат Теменов, «Үз­дік аударма» – Стефан Цвейг­тің «Амок», «Бақилық аға­ның көз жасы» новеллалары­мен Кенже­бай Ахметов, «Үздік балалар әдебиеті» – «Іздер құпиясы» детек­тивтік романымен Бекен Ыбы­райым, «Үздік комикс» – «Жет­піс палуан» комиксімен Жантас Набиоллаұлы, «Үздік кітап дизайны» – «Кенесары хан уа сұлтан Сыдық» кітабымен «AmalBooks» баспасы үздік деп танылды. Әр номинацияның жеңімпазына 5 млн теңге сыйақы тапсырылады.

Айта кетейік, биыл алғаш рет өткізіліп отырған ұлттық әдеби сыйлықтың лауреаттарын марапаттау рәсімі 8 желтоқсан күні Алматы қаласы, Жамбыл атындағы филармония залында, сағат 16:00-де өтеді.

Соңғы жаңалықтар

Ұқсас жаңалықтар