Кеш басында салтанатты жиынға келгендер университет тарихын тарата көрсеткен бейнероликтен оқу орнының бұрынғы һәм бүгінгі тынысымен танысты.
– Оқу орны білім, ғылым ордасы ғана емес, Сыр өңіріндегі рухани-мәдени орталыққа айналғанын көріп отырмыз. Тарихы терең қарашаңырақ биылғы оқу жылында университеттер арасында жүргізілген ең жоғары рейтинг «Asian University Rankings – 2023» қорытындысы бойынша әлемнің 23 елінен қатысқан 760 университет ішінен үздіктер қатарына енді. Айрықша айта кетер тағы бір жаңалық, Корея мен Қазақстан арасындағы жоғары білім саласындағы екіжақты ынтымақтастықты ілгерілету аясында Қорқыт ата университеті мен Сеул ұлттық ғылым және технологиялар университетінің информатика және инжиниринг департаменті бірлесіп, «Жасанды интеллект және информатиканың жаңа мектебі және бизнес-инкубациялық орталығын құру» жобасын әзірледі. Бұл жоба еліміздің экономикалық және цифрлық дамуына үлкен үлес қосады. Сонымен қатар университет академиялық артықшылықтар орталықтары ашылатын 20 өңірлік жоғары оқу орындары қатарына кірді, – деді Ғылым және жоғары білім министрі.
Облыс әкімінің орынбасары Нұрымбет Сақтағанов батыл бастамалар мен тың ізденістер арқылы университет отандық жетекші оқу орындары арасында лайықты орын алып отырғанын атап өтті.
Жыл сайын жергілікті бюджет есебінен әлеуметтік жағынан аз қамтылған отбасылар балаларын оқыту үшін білім гранттары бөлініп отыр. Университеттегі жас ғалымдардың археологиялық, аграрлық саладағы жобалары үнемі қолдау тауып келеді. Заман ағымына ілесе білген оқу орнында жаңа мамандықтарды оқытып, кадрлар даярлаудың мүмкіндігі мол. Алда бюджет есебінен экономика салалары бойынша мамандықтар санын көбейту жоспарланып отыр.
Қорқыт ата атындағы Қызылорда университетінің басқарма төрағасы – ректоры Бейбіткүл Кәрімова іргесі қаланғалы бері бірегей білім ордасында 80 мыңға жуық маман даярланғанын жеткізді. Өңір экономикасы салаларындағы мамандардың 80 пайызға жуығы осы қарашаңырақтан түлеп ұшқандар. Салтанатты жиын «Таным тұмары» атты театрландырылған қойылымға ұласып, ұстаздар мен ғалымдарға құрмет көрсетілді.
ҚЫЗЫЛОРДА
