Шаруалардың жақын маңдағы тұрғын үй иелері мен шаруашылық құрылыстардың су өткізуге кедергі келтіретініне алаңдайтынын ескерген өңір басшысы тиісті тұлғаларға нақты шаралар қабылдауды ескерткен еді. Одан бері біршама уақыт өтті.
Алайда қараша айында Сеңкібай арнасына қатысты жұрт жанайқайын БАҚ өкілдеріне жеткізді. Жергілікті жұртшылықтың айтуынша, 14 елді мекенге су жеткізіп отырған каналды әркім өз бетінше бітеп тастаған екен. Соның салдарынан егіс алқаптарына бірнеше жыл бойы су жетпей келеді. Осы мәселені оңынан шешуді талап еткен жұртшылық ушыққан мәселеге жергілікті атқарушы билік нүкте қойса дегенді алға тартады.
«Каналдың бойында отырған халықты кім ойлайды? Әлдекімдердің арнаны бітеуі салдарынан халық жапа шегіп отыр. Жергілікті атқарушы билік өкілдері біздің шымбайымызға батқан осы мәселені шешіп берсе дұрыс болар еді. Халыққа қарайласатын кім бар өзі?», деген Сеңкібай ауылының тұрғыны Әнуар Серікбаевтың жанайқайы ешкімді бейжай қалдырмаса керек.
Расында да уақытында арнасынан асып аққан канал суының Тараз қаласынан шығар тұсының қаңсып қалғаны кімді де болсын ойландырмай қоймайды. Шіліңгір шілдеде су іздеп сарылған халықты әлдекімдердің арнаны қолдан құрғатып отырғаны ашындырғаны ақиқат. Олар ықпалды адамдардың өз тірлігі үшін жұрттың жүйкесіне ши жүгірткеніне өкпелі. Мұндай келеңсіздіктің ары қарай жалғасқанын қаламайды.
Өткір мәселеге байланысты үн қатқан Тараз қаласы әкімінің орынбасары Нұрбол Қалдыбаев мәселенің мәнісіне терең үңілетінін айтқан болатын.
«Бұл дерек бойынша енді ғана хабардар болып тұрған жайым бар. Алдағы уақытта осы мәселеге қатысты нақты жұмыстарды бастайтын боламыз. Қорғау аумағына кірген жекеменшік кәсіпкерлер, жеке үйлер бар, заңсыз меншіктеп алу бар, каналдарға кәріз жүйелерін шығарып қойған деректер кездеседі. Сол бойынша жұмыстар жүргіземіз», дейді Тараз қаласы әкімінің орынбасары.
Расында да жаз мезгілінде арна суына жарымаған жұрттың жанайқайын бірнеше мәрте естіген болатынбыз. Мәселен, Сарысу ауданына қарасты Ұйым елді мекенінің шаруалары «Сарыөзек» арнасынан келетін суға жарымай отырғанын, су тапшылығы салдарынан шығынға батқанын айтып дабыл қаққан еді. Аталған мәселе «Egemen Qazaqstan» газетінде тамыз айында «Шығынға батқан шаруалардың мәселесін кім шешеді?» деген тақырыппен жарияланған.
Қыс мезгілінің қамын жазда ойлайтын жұрт жаздың мәселесін қыс кезінде қамдағанды жөн көретін секілді. Оны олардың жанайқайынан аңғару қиын емес. Олар осылайша қарлы қараша айында Сеңкібай арнасының мәселесіне бас ауыртқан еді.
Қала әкімінің орынбасары аталған мәселе бойынша талдау жұмыстарын жүргізген де болар. Әйтсе де, жаз мезгілінде мұндай мәселе қайталанбасына кім кепіл? Сеңкібайдағы жанайқай толығымен шешімін тапты ма, әлде проблема күйінде қалды ма? Уақытында көре жатармыз. Жалпы, жұрттың жанайқайы назарымыздан тыс қалмақ емес. Өйткені жаз мезгілі келсе болды, шаруалардың мәселесі алдымыздан жиі шығады. Жұрттың тілегін жергілікті билік дер кезінде ескерсе дейсің.
Жамбыл облысы
