Соның бірі – өткен жазда табылған басына тәжі киіп, тақта отырған адам бейнесі. Археологтердің пікірінше, бұл бұйым сол замандағы патшаға тиесілі болған. Құнды жәдігер туралы танымал археолог, тарих ғылымдарының докторы Зейнолла Самашев: «Бұл көне түркі мәдениетін зерттеушілердің алдында бірінші рет ашылып отырған жаңалық. Тақтың бар екенін білетінбіз, бірақ оның түрі қандай, қалай әшекейленді, соны білмейтінбіз. Осының бәріне жауапты осы салпыншақтарда салынған суреттер, жанрлық композиция арқылы біліп отырмыз», депті.
Археологтер осы уақытқа дейін қазба жұмыстары кезінде мұндай бағалы дүние тапқан емес. Жәдігердің сипаттамасына келер болсақ, тақтың оң және сол жағында бірі жүгініп (сол жақта), екіншісі оған қарсы бір тізелей отырып ілтипат жасаған қызметшілер бейнесі салынған. Қос қызметшінің шаш қою үлгісі түркі мүсіндерінде көптеп кездеседі дейді мамандар.
«Көне түркі қоғамында ерлер ұзын шаштарын бірнеше (бір, үш, бес, алты, жеті, сегіз, тоғыз) бұрымды етіп, бұрымның ұшын әшекейлі затпен бекітіп, арқа тұсына салбыратып жүрген. Кейбір бәдіздерде шаштарын тиянақтап қырқып қысқартқандары да бар. Не болса да, түркілерде шашын бұрымдау, қырқып тастау секілді түрлері болғандығы анық», дейді түрколог-ғалым Қаржаубай Сартқожаұлы.
Сондай-ақ тәжінің өң бетінде доға тәрізді доғал тесік орналасса, тақтың үстінде жайғасқан билеушінің бейнесі салынып, қос қапталында қызметшілерге қарап тұрған жылқы тұқымдас хайуанның басы анық бәдізделген. Қағанның қолында билік символикасын білдіретін құрал және шекелігіне ежелгі дәуір патшаларына тән жылан бейнелі атрибуты бар үш жапырақты бас киім. Жалпы, көне түркі дәуіріне тән бас киімдер, шошақ төбелі, үш төбелі, төрт, бес сайлы, орама және басқа түрлі болып келеді. Бұл жәдігер 2001 жылы Моңғол даласынан табылған Білге қаған тәжісіне біршама ұқсастығы бары байқалады. Сонымен қатар қағанның басындағы үш жапырақты миниатюралық этнотәжісі Күлтегіннің бас мүсінінде бәдізделген бейнемен ұқсастығы байқалады.
