Жекешелендіруге жіті назар

Жуырда «Самұрық-Қазына» компаниялар тобын жекешелендіру жөніндегі басқарушы комитет құрылды. 14 адамнан тұратын комитеттің  басшысы болып қордың басқарма төрағасының орынбасары Елена Бахмутова тағайындалып, ол баспасөз мәслихатын өткізді. «Ережені жасау кезінде қор қызметкерлері мен бағдарлама операторы «Самұрық-Қазына Контракт» ЖШС өткен жеке­шелендірудің тәжірибесін, Қа­зақстан Республикасының заңнамасы мен озық шетелдік тәжірибені басшылыққа алды. Ереже іс-шаралардың ашықтығын қамтамасыз ететін технологияларды пайдалануға негізделеді. Заңдылық пен экономикалық қажеттілікке келсек, сатылымға шығарылатын активтер ең алдымен тәуелсіз сарапшылардың заңдық сараптамасынан өткізіледі. Екіншіден, қор активтерді тәуелсіз баға­лау­шылар белгілеген әділетті баға­мен ғана сатады. Активтерге тек сату үшін жөнсіз баға қойыл­майды. Кейбір активтерге сұ­ра­ныс болмаса, қор мен оның ен­­ші­лес компаниялары аталған мүлік­ке қатысты тиісті шешім қа­былдайды», деді Е.Бахмутова. Ереже барлық мүдделі тарап­тардың құқы мен міндеттерін анықтау, активтерді сату ал­дын­дағы үдерістер мен сату тәсілдерін нақтылау, сонымен бірге аукциондар мен тендерлерді өткізу шараларын белгілейді. Сондай-ақ, құжатта стра­тегиялық активтер мен нысан­дарды сатуға шектеу қойылған. Үкіметтің үстіміздегі жылғы 12 мамырдағы қаулысымен жекешелендіру бағдарламасы аясында бәсекелестік ортаға сатуға шығарылатын «Самұрық-Қазына» АҚ-тың компаниялар тізімі бекітілген. Үкімет шешімі бойынша жеке секторға  «Самұрық-Қазынаның» 106 компаниясының түрлі үлесі сатылады. Соның ішінде 5 компанияны  ІРО мен SPO-ға шығару көзделген. Осы жылдың маусым-шілде айларында «Қазақстан темір жолы» АҚ құрамындағы 4 компания, «Қазатомөнеркәсіп» АҚ құрамындағы 2 және «Қазақстан инжиниринг» АҚ құрамындағы 4 компания сатуға шығарылады. «Егемен-ақпарат».