Үкіметтің жаңа құрамы толық жасақталды деп айтуға әлі ерте. Үкіметке тағайындалып жатқан жаңа министрлерге қатысты қоғамда әртүрлі пікір бар. Біреулері тәжірибесі аз десе, енді бірі жас дейді. Яғни «Халықаралық аренада өздерін қалай ұстай алады?», «Еліміздің абыройы мен атағын белгілі деңгейде қорғай ала ма, жоқ па?» деген қорқыныш бар. Бұған да көңіл бөлуіміз керек. Айтпағым, елдің арасында жүріп, оларды халық танып, беделі көрініп жатқандар сайланатын болса, жұрт та оны қолдап, оң көзқараспен қарайтыны анық. Жаңадан сайланып жатқан депутаттар елімізге бір өзгеріс әкелетінінен үміттіміз.
Халықтың ішінен жаңа тұлғалар билікке келетін болса, онда көп өзгеріс болатыны сөзсіз. Халық идеясы мықты, іскерлігі жоғары жаңа адамдарды күтеді. Елдің санасында қалып қойған кешегі Шерхан Мұртаза, Фариза Оңғарсынова, Амангелді Айталы сияқты тұлғалар бар. Неге қазір осындай адамдар жоқ?! Бұл тұлғалар қазіргі депутаттарға үлгі болу қажет. Шынын айтсақ, қазіргі депутаттарды ел-жұрт танымайды және кім екенін білмейді. Оларды қарапайым халық білмесе, қандай өзгеріс күтуге болады? Неғұрлым көп өзгерісті күту үшін сайлау әділ және ашық өтуі қажет.
Президент өзгерістерге бастама болатын бірқатар мүмкіндікті көрсетіп берді. Оны жүзеге асыратын осы жаңа құрам. Үмітіміз өте зор. Депутаттар халықтың мүддесін қорғайды деген сенімдеміз.
Қайрат АЙТБАЙ,
саясаттанушы
