Астарлы ой мен қағытпа қалжыңды тамашалап, карикатура қызығымен демалғысы келетін көрермен үшін Мемлекеттік Орталық музейде елімізге танымал карикатурашы-суретші Еркін Нұразханның «Карикатура тарланы» атты көрмесі ашылды. Мәдениет қайраткері, Қазақстан Суретшілер, Журналистер, Жазушылар одағының мүшесі Еркін Нұразханның 70 жасқа толған тойына орай салтанатты түрде ашылған көрмеде автордың 160-тан аса жұмысы назарға ұсынылды.
Еркін Нұразхан – қазақ бейнелеу өнерінде карикатура, шарж (достық, әзіл портрет) жанрының қалыптасып, дамуына өзіндік қолтаңбасын қосқан майталман маман. Карикатурада 40 жыл бойы түрлі туындыларымен танылған суретшінің қозғаған тақырыптары әр алуан, бейнелеген кейіпкерлері сан қырлы. «Күлкінің ар жағында мазақ емес – мазасыздану, жазғыру емес – жаны ашу жатқанын жұрт түсінсе деймін. Құлағанды тұрғызу, қирағанды бүтіндеу, жылағанды жұбату, керенауды ояту, мұңайғанды езу тартқызу – сатиралық суреттердің абзал борышы болып қала бермек», дейді суретші. Ал техникасы өте қарапайым: қағаз, қаламұш, тушь, акварель бояуы, гельді қалам, түрлі-түсті қарындаштар.
Автордың айтуынша, «Карикатура тарланы» көрмесі 1982 жылы бастау алған шығармашылық жолының толық көрінісі іспеттес. 2020 жылы қорға өткізілген 534 жұмыстың таңдаулылары іріктеліп, мерейтойға орай галерея ретінде көрермен назарына ұсынылып отырғанына Еркін Нұразхан аса қуанышты. Ал ақын Бақыт Беделхан «бір туындысы – бір сын мақаладай» деп бейнесөз шеберінің тапқырлығы мен өткірлігін жоғары бағалады.
Көрме 2023 жылдың 31 қаңтарына дейін жұмыс істейді.
Баян МҰРАТБЕКҚЫЗЫ
АЛМАТЫ
