Бүгінде ведомство «Қазақстан Республикасының кейбір заңнамалық актілеріне мемлекеттік жастар саясаты және әлеуметтік қамсыздандыру мәселелері бойынша өзгерістер мен толықтырулар енгізу туралы» заң жобасы негізінде заңға тәуелді актілер әзірлеп жатыр. Құжат аясында Жастар ресурстық орталықтары қызметкерлерінің мәртебесін ұлғайту мүмкіндігі пайда болады. Сонымен қатар еңбек жасақтарын құру, ұйымдастыру, қамтамасыз ету және олардың қызметіне мониторинг жүргізу көзделген.
– 2021 жылы 15 қаңтарда Парламент палаталарының бірлескен отырысында Мемлекет басшысы жастарға байланысты ұсыныстарды нақтылады. Заң жобасын жан-жақты талқылау мақсатында көптеген басқосу ұйымдастырылды. Оған халықаралық мамандар мен сарапшылар жұмылдырылды. Жалпы, құжат мемлекеттік жастар саясаты саласын жетілдіруге, қоғамдық қатынастарды кешенді реттеудің тиімді құқықтық негізін қалыптастыруға, жұмыспен қамтуды қамтамасыз етуге, жастардың дамуы үшін қолайлы жағдай жасауға бағытталған. Заңда жастардың даму индексі; жастардың әлеуметтік қызметтері; жастармен жұмыс жөніндегі маман; жастардың еңбек жасақтары ұғымдарын заңнамалық бекіту ұсынылды, – деді Данияр Қадыров.
Заңның бір тармағы ретінде таныстырылған жастар индексін қарапайым тілмен түсіндірсек, бұл 14 пен 35 жас аралығындағы азаматтардың қаншалықты спортпен айналысатыны, кәсіби біліктілігін шыңдау үшін тренингтерге қаншалықты қатысатыны, қоғамдық белсенділігі бойынша нақты мәліметтерге қол жеткізу тәсілдерін біріздендірудің таптырмас құралы. Бір жағынан жиынтық – мемлекеттік жастар саясатын іске асыру бойынша мемлекеттік органдар қызметінің тиімділігін арттыруға жол ашады. Демек осы санаттағы қазақстандықтарға қай өңірде қандай қолдау көрсету керек екенін анықтайды.
– Біздің әзірлеп жатқанымыз – БҰҰ-ның жастарды дамытудың жаһандық индексінің отандық нұсқасы. Индексті енгізу еліміздің халықаралық ұстанымына оң әсер етеді, – деді Д.Қадыров.
Бұған қоса құжат шеңберінде жастар саясатының негізгі бағыттарына қосымша екі тетік енгізілген. Олар – цифрлық сауатты арттыру және волонтерлік қозғалысты дамыту.
Жиында вице-министр саланың әлеуметтік желілердегі ақпараттарды қадағалау мақсатында қандай жұмыстар жүргізілетінін атап өтті. Егер әлеуметтік желіде мемлекеттің тұтастығына, Конституцияға қайшы, ұлтаралық және дінаралық араздық туындататын жазба болса және ол құқық қорғау органдары тарапынан дәлелденсе, бұғатталатынын жеткізді.
– Министрлік аталған мәселелерді заң шеңберінде қадағалап отыр. Қазір «Масс-медиа туралы» заң жобасы қоғамның ашық талқылауынан өтіп жатыр. Оның ішінде әлеуметтік желілер жұмысы да бар. Жаңа заң жобасы 27 қаңтарға дейін ашық талқыда болады. Сондықтан ұсыныстар болса, қарауға әзірміз, – деді вице-министр.
«Жалпы заң жобасы жастардың дамуы үшін қолайлы жағдайлар жасауға бағытталған. Осы ретте жастар санатына кіретіндер саны ұлғаюына байланысты жеңілдікпен жалға берілетін тұрғын үй бағдарламасына да өзгерістер енгізу қарастырылып жатыр», дейді Данияр Қадыров. Айта кетейік, елімізде бұрын жастар саны 3,7 миллион болса, қазір меженің өзгеруіне байланысты 14-тен 35 жасқа дейінгі азаматтар 5,8 миллионға жетті.
