Елордада 440-тан астам интернет-алаяқтық фактілері тіркелді

«Жыл басынан бері елордада интернет-алаяқтықтың 443 фактісі тіркелді. Көрсеткіш ай сайын артып келеді. Салыстырмалы түрде алып қарасақ 2021 жылы 188 факт тіркелген. Бүгінгі таңда 443 факт бойынша 45 істі қарау аяқталып, 148 іс тоқтатылды. Сонымен қатар интернет-алаяқтықтың 150 фактісі ашылып, нәтижесінде 29 адам ұсталды, оның 13-і қамауға алынды», деді Қайрат Мәдиев баспасөз мәслихатында.

Спикердің айтуынша, интернет-алаяқтықпен байланысты әлеуметтік желілердегі чаттар мен сайттарды бұғаттау бойынша жұмыстар жүргізіліп жатыр. Алайда, бұғаттау біраз уақытты алады, себебі интернет-ресурстардың көпшілігі шетелде шоғырланған.

«Интернет-алаяқтық пен киберқылмысқа бірлесіп күресу мақсатында IT қоғамдастық өкілдерімен бірнеше жиналыс өтті. Егер біз 54 мемлекет қатысатын халықаралық конвенцияға қосылсақ, бұғатталатын сайттар мен чаттар саны артады», деп қосты Мәдиев.

Сондай-ақ полиция департаментінің өкілі бүгінгі таңда интернет-алаяқтық пен киберқылмыстың алдын алу бойынша профилактикалық іс-шаралар жүргізіліп жатқанын атап өтті.

Гүлшахра САНСЫЗБАЙ