– Бізді «Астана Операға» шақырғандарына, 2018 жылдан бері жалғасып келе жатқан жобамызға қызығушылық танытқандары үшін театр басшылығына ризашылығымызды білдіреміз. «Супер әже» жобасы әжелерді белсенді әлеуметтік ортаға тарту бойынша өзіндік тәжірибе, зейнетке шыққаннан кейінгі өмірге бейімделу сынағы іспетті. Бүгінде әжелердің үйде отыруы міндетті емес, олар өз дарын-
дарын паш етіп, сахнада өнер көрсете алады. Біздің жоба-байқауымыздың мақсаты – отбасының рөлін нығайтып, оның әлеуметтік-мәдени қоғамдық кеңістіктегі дәрежесін көтеру, ескі таптаурындарды жойып, адамдарға өмірдің 60-тан кейін де жарқын бола алатынын және әр алуан сезімдер сыйлайтынын көрсету, – дейді жоба ұйымдастырушысы Валентина Толмачева.
Өз кезегінде «Астана Опера» директорының орынбасары Айжан Құрманғалиева барлық буынға еліміздің қоғамдық және мәдени өміріне белсенді араласуға мүмкіндік беретін мұндай бастамаларға қолдау көрсету театр үшін аса маңызды екенін атап өтті. «Жобаның ұрпақтар арасындағы байланысты нығайтуға, біздің ұлттық колоритімізді сақтауға және өскелең ұрпақты салт-дәстүрмен таныстыруға бағытталғаны керемет», деді директордың орынбасары.
«Супер әже» жоба-байқауының авторы Валентина Толмачевамен бірге бұл жобада Әлия Райымбердиева мен Назкен Жирентаева да жұмыс істейді. Жоба-байқау Халықаралық әйелдер күні қарсаңында Сарыарқа ауданы әкімдігінің қолдауымен өтеді. Мәдениет пен өнер саласындағы тәуелсіз сарапшылардан құрылған қазылар алқасына қатысушы әжелердің өнерін 10 балдық жүйе бойынша бағалауға тура келеді. Байқаудың үш айналымында үміткерлер бірнеше кезеңнен өтуі керек, мәселен, «Сүйікті әже» атты таныстыру кезеңінде қатысушының отбасы мүшелері (балалары, немерелері) өз отбасы мен отбасылық дәстүрлері, өз әжесі туралы, оның немен әуестенетіні туралы бейнетаныстырылымда айтып беруге тиіс. Қатысушылар «Дәмі тіл үйіреді» кезеңінде өздерінің аспаздық дарындарын паш етеді. Ал «Дарындар сыңғырында» (шығармашылық сайыс) өз өнерін ортаға салып, «Бал орын алсын» қорытынды кезеңінде сәнді көйлектермен жасанған әжелер сән үлгісін көрсетеді. Ең көп ұпай жинаған қатысушы байқау жеңімпазы атанып, оған «Супер әже- 2023» атағы беріледі.
