Суретті түсірген автор
Иә, қыс қызығы – сырғанақ. Қар жауса болды, шанасын сайлайтын ойын баласының әдеті емес пе?! Самар ауылының ішіндегі үш сырғанақта да ойын қызып тұр.
– Демалыс күндері балаларымды осында әкеліп сырғанақ тепкіземін. Қазір қар қалың, жақсы сергіп қалады. Негізі, ауылымыздың шетінен үлкен сырғанақ орнын салса, тіпті жақсы болар еді. Шаңғы тебуге де жағдай жасалса деймін. Онда балалардан бөлек жастар да барар еді. Мұнда келетін балалар көп, – дейді ауыл тұрғыны Айнұр Ерболқызы.
Рас, ата-аналар балаларының жан-жақты дамуы үшін қысқы спорттық ойын алаңдарының болғанын қалайды. Самар, Сарыбел өңірінде жаз қалай қызықты өтсе, қысы да қызыққа толы болса деседі. Аудан Бұқтырма су қоймасын жағалай жатқан соң, жазды жұрт жақсы өткізеді. Сол сияқты қыста да сырғанақ тебетін орындар көбейіп, мұз айдындары ашылса деген елдің тілегі бар.
– Ауылымызда үш сырғанақ тебетін орын бар. Қауіпсіз. Айналасы кең. Ауданымыздың жастары бос уақытын әртүрлі үйірмелер мен спорттық ойындарға арнайды. Әсіресе футбол, волейбол, теннис ойнайды, – дейді Самар ауданы жастар орталығының директоры Ерназар Сауық.
Естеріңізге салсақ, Президент өткен жылды Балалар жылы деп жариялаған болатын. Жыл аяқталғанымен, жауапты мекемелер балаларға деген қолдауын тоқтатқан жоқ.
Шығыс Қазақстан облысы,
Самар ауданы
