Аймақтар • 17 Ақпан, 2023

Каспий жағасына келушілер көбейеді

410 рет
көрсетілді
1 мин
оқу үшін

Теңіз жағалауындағы Ақтау қаласы мен «жұм­бақ жайлап, аңыз өрген Маңғыстауға» қызығу­шылықпен келетін туристер саны жылдан-жылға артып келеді. Өткен жылы жаз айларында шетелдік жиһанкездер мен саяхатшылар респуб­лика бойынша Ақтауда демалуды, саяхаттауды көбірек таңдаған.

Каспий жағасына келушілер көбейеді

Бұл жағдай өңір тарихында тұңғыш рет Ақтауға туристік бағыттағы арнайы чартерлік рейстердің қатынай бастауына жол ашты, сондай-ақ Ақтау мен шет елдер арасындағы тұрақты рейстер саны да арта түсті.

Маңғыстаудың ерекше табиғатымен бірге шетелдік және жергілікті туристерді Каспий теңізі жағалауындағы демалыс орындары мен курорттық кешендер, олардағы қызмет көрсету деңгейі жоғары сапалы қонақүйлер, демалыс аймақтары, аквапарктер мен ойын-сауық орталықтары қызықтырыпты. Бұл жағдайлар Ақтау халықаралық әуежайын алдына үлкен жоспар қоюға ұмтылдырды. Қазір олар чартерлік рейстерге аптасына жеті рет қатынайтын мүмкіндікті қарастырып, жан-жақты ұйымдастыру жұмыстарын, тараптардың өзара келіссөздерін бастады.

Ақмаржан Ақтау биыл туристердің ірі легін қабыл­дауға әзір. Бұл – өңірдегі туристік әлеуеттің өркендей бастағанының және жоғары сапалы сервистік қызметтің көрінісі. Алайда өңір туризмі бұл жетістіктерімен тоқтап қалмай, алдағы уақытта туризмді одан әрі дамытып, туристер мен қонақтарды, саяхатшыларды тарта түседі.

 

Маңғыстау облысы