Жақында оның сондай үлгіде салынған «Мұнар күн» картинасы Лондон қаласында өткен «Алтын таланттар уақыты» халықаралық байқауының бірінші жүлдесін иеленді. Онлайн форматта өткен байқауға әлемнің 39 елінен 200-ге жуық үміткер қатысқан.
– Халықаралық байқаудың жарнамасын әлеуметтік желіден көрген едім. Былтырғы қарашада бірнеше картинаның арасынан біреуін таңдап, бағымды сынап көру үшін жібердім. Бұл байқау 2007 жылдан бері тұрақты өтіп келеді, – дейді Назерке Ищанова.
Ол 1836-1838 жылдардағы халық-азаттық көтерілісінің көсемі Исатай Тайманұлының туғанына 230 жыл толуына орай дайындалған «Асқақ рух» кітабының беттеуші-дизайнері болған. Сол кезде тарихшы ғалымдар мен өлкетанушылардың зерттеу еңбектерімен жете танысқан. Кейін батыр Махамбет Өтемісұлы мен ақын Ығылман Шөрекұлының Исатай туралы жырларын қызыға оқыпты. Сол кезде қиялында батырдың кесек тұлғасы қалыптаса бастаған.
– Қазақ деген ұлы халықтың шынайы ғұмырдастаны әлі жазылып біткен жоқ. Талай жыл, талай ғасыр бойы ұлтымыздың ғұмырдастаны жазыла береді. Сондықтан бұл картинамды азаттықтың ақ таңын аңсап күткен, өлшеулі өмірі ат үстінде жорықпен өткен Ұлы дала батыры Исатай Тайманұлының асқақ рухына арнаған едім, – дейді дизайнер Н.Ищанова.
Қазір дизайнер «Қыр баласы» қоғамдық қорының мүшелерімен бірге ел тәуелсіздігі үшін қанын төгіп, жанын берген ұлт батырлары мен қуғын-сүргінге ұшыраған Алаш арыстарының өмірін, еңбегін зерттеп жүр. Оның жеке қорында ұлт зиялылары, батырлар мен арыстары бейнеленген 50-ден астам картина бар. Картинаның бәрі Digital Art стилінде салынған.
Атырау облысы
