Парламент Мәжілісінің депутаттығына «Ауыл» ХДПП атынан түсетін кандидаттар фотокөрме аясында қала тұрғындарына партия сайлауалды бағдарламасының негізгі бағыттарын түсіндірді. Партияның азық-түлік бағаларын тұрақтандыру бойынша қолданатын тәсілдері жайлы айтты. Азық-түліктің шығу «төркінінен» түсінігі жоқ, «еліміздің азық-түлік қауіпсіздігін дүкен қамтамасыз етеді» деп есептейтін бүгінгі буынның жетесіне жетердей үгіт-насихат жұмыстарын жүргізді.
– Азық-түлік сөрелерде өспейді, сөрелерде баға өседі. Оның неліктен өсетінін және оны қалай тұрақтандыруға болатынын «Ауыл» партиясы жақсы біледі. Салалық мемлекеттік органдар мен жалпы үкімет үшін негізгі және бірінші кезектегі міндет – өндіріс көлемін, әсіресе экологиялық таза өнім көлемін ұлғайту, сондай-ақ ауыл шаруашылығы өндірушілері үшін қайта өңдеу мен логистикалық инфрақұрылымды жолға қою. Өнімдер сөрелерге тікелей түсуі керек. Біз Мәжіліске барғанда азық-түлік нарығынан артық делдалдарды ығыстыру үшін бар күшімізді саламыз. Фермерлерді ірі сауда орталықтарына мүмкіндігінше жақындатамыз. Партияның Парламент Мәжілісіне ұмтылуындағы басты себептерінің бірі – осы, – деді кандидат Айбын Төреханов.
Метрода өтіп жатқан фотокөрмеге назар аударып, кандидаттардың үгіт-насихатына құлақ түрген жолаушы қалалықтар кандидаттардың ұстанымына қызығушылық танытып, қолдау білдірді. Кандидаттар азық-түлік өндіру ісінің байыбына бармайтын, оны оңай шаруа деп ойлайтын қала жастарына азық-түлік өнімдерінің дүкен сөрелеріне қандай еңбекпен келетінін фотокөрме арқылы қызықты форматта көз алдарына келтіріп, сауалдарына жауап берді.
«Ауыл» партиясының өкілдері бастапқы және терең қайта өңдеу кәсіпорындары үшін салықтардың барлық түрін толық жою маңызды екенін айтты.
