Төтенше жағдай • 22 Ақпан, 2023

Қауіпті учаске көп

421 рет
көрсетілді
2 мин
оқу үшін

Семей қаласында көктемгі су тасқыны қаупі бар 15 учаске анықталған. Мұндағы бас-аяғы 631 тұрғын үйді су басу қаупі бар. Семей қалалық төтенше жағдайлар басқармасының ақпаратына сүйенсек, тасқын суға тосқауыл қою үшін су және өзен арналары тазартылып, су өтетін құбырлар кеңейтіліп, жағалауды нығайту сияқты жұмыстар жүргізіліп жатыр.

Қауіпті учаске көп

Ертіс өзенінің Мирный кенті мен Ипподром аумағындағы тұсында мұз жару жоспарланып отыр. Бүгінгі таңда Ертістегі мұздың қалыңдығы 62 см болса, су деңгейі 211 см.

– Жыл сайын су тасқыны қаупі бар 15 учаскеден қар алдын ала шы­ғарылады. Осы күнге дейін 380 мың шаршы метр қар шы­ға­рылды. Семей қаласы бо­йын­ша арық жүйесінің ұзындығы 52 шақырымды құрайды. Арық жүйесін «Зе­ленстрой Се­мей» ЖШС тұ­рақты тазалайды. Онда күн сайын 25 адам және 5 бір­лік арнайы техника жұ­мыл­дырылған, – дейді Семей қаласы Төтенше жағ­дай­лар бас­қармасы басшысының міндетін атқарушы Әлібек Тұр­сынханов.

Өткен демалыс күндері Се­мей қаласының әкімі Нұрбол Нұр­сағатов та су басу қаупі бар аумақтарды аралап, атқарылып жатқан жұмыстардың анық-қанығына көз жеткізді. Жо­ғарыда айтқан 15 учаскенің ішінде Шығыс кенті мен Согра ауданын су басу қаупі жо­ғары болып тұр. «Көктемгі су тасқынының алдын алу үшін Семей қаласының әкімдігі бө­геттер салу туралы шешім қа­былдады. Согра аумағында 500 метрлік бөгет салуды бастадық. Қазіргі уақытта 17 техника жұ­мылдырылып, топырақ тасуда. Бөгет арқылы Соградағы 40-қа жуық жер үйді су басудан сақтай аламыз. Қазіргі таңда коммуналдық қызметтер өзен арналарын да тазалап жатыр. Сондай-ақ Шығыс кентіндегі саяжайларға 700 метр болатын бөгет салу жоспарда бар. Бөгеттерді салуға қалалық бюджеттен 26 млн теңге қаражат қарастырылды», дейді қала әкімі Н.Нұрсағатов.

Қалада қар суының бө­гетсіз ағып кетуі үшін кәріз құдық­тарының қақпақтарын ашу жұмыстары да басталды. Семей қалалық жолаушылар көлігі және автомобиль жолдары бөлімінің басшысы Медет Алтаевтың айтуынша, шаһардың 30 көшесінде 500 су қабылдау құдығы ор­наласқан. Қала көшелерін қардан тазалу үшін 80-нен астам техника мен 6 жұмысшы бригадасы жұмылдырылған. Сонымен қатар көктемгі су тасқыны ке­зеңінің жақындауына байланысты қалалық коммуналдық қызметтер күшейтілген жұмыс режіміне ауыстырылды.