Сәрсенбіден бейсенбіге қараған түні футболдан Чемпиондар лигасының 1/8 финалдағы алғашқы матчтары өз мәресіне жетті. Биылғы чемпиондықтан басты үміткерлердің бірі «Манчестер Сити» Германияға сапар шегіп, қолда тұрған жеңісінен айырылып қалды. Бірінші таймда Рияд Марез қонақтарды есепте алға шығарғанымен, екінші таймда хорватиялық Йошко Гвардиоль «Лейпцигке» тең нәтиже сыйлады – 1:1.
Сондай-ақ қатар өткен екінші матчта «Интер» өз алаңында «Порту» клубын қабылдап, кездесудің 86-минутында Лукаку соққан жалғыз голдың арқасында жеңіске жетті – 1:0. Қарымта матчтар 14 наурызға жоспарланған.
