Бразилияда өтіп жатқан әлем чемпионаты бел ортасына да жақындап қалды.
Қазір командалар үшінші турдың соңғы ойындарын өткізіп жатыр. Бұл тур кейбір құрамалар үшін не бел кететін, не белбеу кететін тур болып тұр. Әсіресе, үшінші турдағы матчтар Еуропа елдері үшін ең жауапты болып саналады.
Сейсенбі күні Еуропаның ең мықты деген тағы бір құрамасы осы сыннан сүрініп, 1/8 финалға өте алмады. «D» тобында Уругвай Италияны 1:0 есебімен жеңіп, келесі айналымға шығармай тастады. Бұл кездесуде 81-ші минутта Диего Годиннің соққан добы Италияның үмітін үзді. Өйткені, Аппенин түбегі елі қарсыласымен тең ойнаса, жарысты жалғастыруға мүмкіндігі бар еді.
Осы топтағы Коста-Рика мен Англия құрамаларының арасында өткен ойын тең есеппен аяқталды. Тұманды Альбионның командасы соңғы турдың нәтижесіне қарамай-ақ Испания мен Италия құрамалары сияқты әлем чемпионатымен бұған дейін-ақ қоштасқан болатын.
Осы күні «С» тобында Колумбия Жапонияны 4:1 есебімен, ал Грекия Кот’д Ивуар командасын 2:1 есебімен жеңіп, 1/8 финалға шықты. Осы арада Грекияның 1/8 финалға алғаш рет шығып отырғанын атап көрсеткен жөн. Енді плей-оффта Колумбия Уругваймен, Коста-Рика Грекиямен кездеседі. Осы ойындарда Колумбия мен Коста-Рика жеңсе, алғаш рет ширек финалға шығады. Грекия құрамасы туралы да осыны айтуға болады.
Кеше кешкісін Аргентина Нигериямен, Иран Босния және Герцеговинамен, Гондурас Швейцариямен, Эквадор Франциямен кездесті.
