«Атырау» газетіндегі жаңалық

Мұнайлы өңір айнасы саналатын, 90 жылдан астам тарихы бар облыстық «Атырау» газетінің редакциясы елең еткізерлік жаңа бастамаларымен танылуда. Бұл – басылымның түрлі танымдық-сараптамалық сипаттағы төрт бірдей қосымша шығара бастағандығы. «Газет ішіндегі газет» форма­тындағы алғашқы қосым­ша «Биз­несмен» деген атаумен был­тырғы жылдың ақпан айында жарық көрген болатын. Онда жеке кәсібімді ашып, отандық өндірісті өрістетемін деп талап­танушыларға насихаттық-түсін­дірме тұрғысынан нақты көмек берілген болатын. Бұл бас­тама, әсіресе, алыс ауылдардағы жас кәсіпкерлер үшін үлкен қолдау болғаны даусыз. Редакция биыл «Темірқазық» аталатын тағы бір танымдық қосымшаның тұсауын кесті. Мұнда еліміз алдына мақсат етіп қойған озық 30 елдің қандай мемлекеттер екендігі хақында (жер көлемі, халық саны, экономикасы, салт-дәстүрі, мәдениеті, әлеуметтік-тұрмыстық жағдайы, туризмі, ұлттық ділі, т.б.) жан-жақты мағлұмат берілді. «Те­мірқазықтың» әр саны бір ғана елді таныстыруға арналады. Қазірдің өзінде қосымшаның «Австрия», «Австралия», «Бель­гия» елдері туралы кеңінен баян­даған нөмірлері жарық көріп үлгерді. Жуырда «Атырау» газеті отбасылық өзекті мәселелерді толғайтын «Шаңырақ», құқықтық және заңдылық проблемаларын қаузайтын «Әділет әлемі» деген тағы екі қосымшаны жарыққа шығарды. Олардың алғашқы сандарынан-ақ көтерер жүгінің жеңіл емесі, оқырманды толғандыратын жайларды дөп басуымен ерекшеленетін жаңа жобалар екендігі анық аңғарылады. Жолдасбек ШӨПЕҒҰЛ, «Егемен Қазақстан». Атырау облысы.