Ақынның бай мұрасын насихаттап, ұрпақ жадында жаңғыртуды көздеген «Орамды ойдың Омары» атты байқау Қызылорда қаласы әкімдігінің қолдауымен, облыстық халық шығармашылығын дамыту және мәдени-продюсерлік орталығы, қалалық мәдениет және спорт бөлімі, Айтыс ақындары мен жыршы-термешілердің халықаралық одағы Қызылорда облысы бойынша филиалының бірлесе ұйымдастыруымен өткізілді. Жырға сусаған жұртқа рухани кеш сыйлаған шараның өтуіне шайыр ұрпақтары демеушілік танытыпты.
Жыршылар байқауында қала әкімінің орынбасары Жанмұрат Сейілов талапкер жастарға сәттілік тіледі.
– Бабадан қалған рухани қазынаның орны қашанда бөлек. Соның ішінде «Сыр елі – жыр елі» деп танылған осы топырақтан түлеген ұрпақтың қанға сіңген жыраулық өнерден алшақ болмасы тағы анық. Омар Шораяқұлының бай мұрасын насихаттау арқылы жас ұрпақ жадында жаңғыртуды мұрат еткен бұл байқаудың берері мол деп білемін, – деді ол.
Шайырдың ұрпағы, Мәдениет саласының үздігі, танымал ақын Серік Ыдырысов жас жыршыларға батасын беріп, өнердегі жолдарың даңғыл болсын деген тілегін білдірді. Шайырдың термелері мен дастандарынан үзінді орындалған облыстық байқауға белгілі жыршылар, Мәдениет қайраткері Руслан Ахметов, облыстық халық шығармашылығын дамыту және мәдени-продюсерлік орталығының сектор меңгерушісі Майра Сәрсенбаева мен Марат Сүгірбай қазылық жасады.
Байқау нәтижесінде қызылордалық Аңсаған Ділдәбекқызы, Жанұзақ Рысбек, Досымжан Құрманғалиев, қармақшылық Арай Оңғарқызы арнайы жүлде алса, Жалағаш ауданынан келген Бақытбек Дәулетбек, қармақшылық Айдана Амантай, қызылордалық Қарақат Әбдікерім жүлделі үшінші орынды өзара бөлісті. Аралдық Инабат Толғанбекова мен қармақшылық Талант Балтабай екінші орынды иеленді. Байқаудың бірінші орыны қармақшылық Мәди Елдес пен қызылордалық Аяулым Абдумажитке бұйырса, бас жүлде мен «Жыршы бала – 2023» номинациясын қызылордалық жас жыршы Нөсер Айдосұлы жеңіп алды.
Жеңімпаздар мен жүлдегерлерге Омар Шораяқұлының ұрпақтары атынан сыйлықтар табысталды.
ҚЫЗЫЛОРДА
