Үндістанда осымен үшінші мәрте жалауы желбіреген әлемдік доданың алғашқы күнінде Шәміл Сафиуллин жаттықтыратын Қазақстан қыздар құрамасы сапынан бірінші болып рингке 52 кило салмақта өнер көрсететін Жазира Орақбаева көтерілді. Былтырғы Азия біріншілігінің қола жүлдегері Дели шаршы алаңындағы бірінші жекпе-жегінде тайпейлік Чан Чиа-Хсунмен жұдырықтасты. Бәсеке басталған бетте ринг ортасын иеленіп, қарсыласын соққының астына алған отандасымыз екінші раунда тайвандық қарсыласын екі мәрте нокдаунға жіберіп, кейіннен жекпе-жекті нокаутпен аяқтады.
Әлем чемпионатының екінші күнінде Қазақстан жанкүйерлері екі отандасымыздың жекпе-жектерін тамашалады. 60 кило салмақта жұдырықтасатын отандасымыз Римма Волосенко «ә» дегеннен мықты қарсыласқа тап болды. Ол алғашқы айналымда өзбекстандық екі дүркін Азия чемпионы Ситора Турдибековамен қолғап түйістірді. Екі мықты арасындағы кездесуді Делидегі спорт кешеніне жиналған жанкүйерлер асқан қызығушылықпен тамашалады. Өйткені екі боксшы да үш раунд бойы бір қарыс артқа шегінбей, шаршы алаңда жеңіс үшін бар өнерлерін ортаға салды. Аса тартысты өткен жекпе-жекте төрешілер Қазақстан боксшысы бір бас жоғары нәтиже көрсетті деп есептеп, 4-1 есебімен жеңісті Римма Волосенкоға берді. Римма екінші айналымда сербиялық Наталья Шадринамен жұдырықтасады.
Волосенконың ізін ала рингке жарақатына байланысты ұзақ уақыт ұлттық құрама қатарынан шығып қалған 81 килодағы Фариза Шолтай көтерілді. Былтырғы ел чемпионатында өз мықтылығын дәлелдеп, құрамаға қайта оралған ауыр салмақтағы жерлесіміз бірінші кездесуінде Тринидад және Тобаго өкілі Лиан Будраммен кездесіп, техникалық нокаутпен жеңіске жетті. Фариза ширек финалда кениялық Элизабет Адямбо Андиегомен күш сынасады.
Үндістандағы жарыстың үшінші күнінде үш қазақстандық боксшы шаршы алаңға шығып, барлығы да қарсыластарынан басым түсті. Атап айтқанда, жеңіл салмақта (48 кг) жұдырықтасатын Алуа Балқыбекова әлем чемпионатының 1/16 кезеңінде сингапурлық Кей Ван Чи Ваймен шеберлік байқасып, қарсыласын айқын басымдықпен тізе бүктірді – 5:0. Ол келесі айналымда Ресей боксшысы Юлия Чумгалаковамен кездеседі. Айта кетейік, Алуа Балқыбекова былтыр Ыстанбұлдағы әлем чемпионатында күміс жүлдеге қол жеткізген болатын.
Сондай-ақ Олимпиада бағдарламасына енетін 54 және 66 килодағы Жайна Шекербекова мен Надежда Рябец әлем біріншілігін сәтті бастап, доданың келесі кезеңіне жолдама алды. Үш дүркін әлем чемпионатының жүлдегері Жайна Шекербекова алғашқы айналымда Оңтүстік Корея өкілі Э Чжи Имді жарыс жолынан ығыстырса, жастар арасындағы Олимпия ойындарының қола жүлдегері, ересектер арасындағы Токио Олимпиадасының қатысушысы Надежда Рябец те бірінші кезеңде Оңтүстік Корея боксшысы Сён Суджиннен төрешілердің аралас шешімімен басым түсті.
Айта кетейік, биылғы қыздар арасындағы әлем чемпионатының жүлде қоры қомақты. Мәселен, жарыс жеңімпазы атанған боксшылар Халықаралық бокс қауымдастығынан – 100 мың, күміс медаль иегерлері – 50 мың, қола жүлдегерлер 25 мың АҚШ доллары көлемінде сыйақы алады.
