Делидегі əлем чемпионатының төртінші күнінде шаршы алаңға Назым Қызайбай (50 кг) мен Карина Ибрагимова (57 кг) көтерілді. Олимпиада бағдарламасына енетін екі салмақтың алғашқысында жұдырықтасқан Назым Қызайбай Делидегі тұсаукесер кездесуінде вьетнамдық Тхи Там Нгуеннен жеңіліп қалды. Бойы мен қолының ұзындығын ұтымды пайдаланған Вьетнам боксшысына қазақтың дарынды қызы еш қарсылық көрсете алмады.
Назымның ізін ала шаршы алаңға 57 килодағы Карина Ибрагимова шықты. Былтыр Ыстанбұлда өткен әлем чемпионатының қола жүлдегері алғашқы айқасынан-ақ биыл да жүлделі орындардан басты үміткер екенін байқатты. Бірінші кездесуін колумбиялық Валерия Арболеда Мендосамен өткізген Карина қарсыласын екінші раундта техникалық нокаутпен жеңіп, келесі кезеңге қиналмай өтті.
Жарыстың келесі күнінде бокс жанкүйерлері төрт отандасымыздың жекпе-жегін тамашалады. Мәдина Нұршаева (70 кг), Жайна Шекербекова (54 кг) мен Валентина Хальзова (75 кг) бәсекелерін жеңіспен аяқтап, қазақ еліне қуаныш сыйласа, алғашқы әлем чемпионатына қатысқан Жазира Орақбаева (52 кг) ел үмітін ақтай алмады.
Бірінші айналымда тайпейлік Чан Чиа-Хсунді нокаутпен жеңіп, мамандардың назарын өзіне аудартқан Орақбаева екінші айналымда үндістандық Сакши Сакшиден айласын асыра алмады. Аса тартысты өткен кездесуде шаршы алаң қожайыны төрешілердің ортақ шешімімен жеңіске жетті – 5:0.
70 кило салмақтағы Мәдина Нұршаева алғашқы кездесуінде кореялық Чой Хонгёнді сенімді жеңді. Бірінші және екінші раундта белсенді болған жерлесіміз соңғы раундта қарқынын үдетіп, қарсыласын бір мәрте нокдаунға жіберді – 5:0. Мадина ширек финалда бразилиялық Барбара Дос Сантоспен қолғап түйістіреді.
54 кило салмақтағы Жайна Шекербекова екінші айналымда өзбекстандық азулы боксшымен жұдырықтасты. 2021 жылғы жастар арасындағы әлем чемпионы Нигина Уктамова мен әлем біріншіліктерінің үш дүркін жүлдегері Жайна аянбай айқасты. Техника жағынан да, соққы жағынан да мықтылық танытқан жерлесіміз бұл кездесуді өз пайдасына аяқтады. Шекербекова ширек финалда колумбиялық Марсел Кастаньед Ариаспен жұдырықтасады. Айта кетейік, жерлесіміз алғашқы айналымда Оңтүстік Корея өкілі Э Чжи Имнен басым түскен болатын.
Бесінші күннің нүктесін Валентина Хальзова қойды. Бұған дейін 70 кило салмақ дәрежесінде жұдырықтасып, биылдан бастап Олимпиада бағдарламасына енетін 75 килода өнер көрсете бастаған Валентина Делидегі әлем чемпионатын жеңіспен бастады. Дүниежүзілік доданың екінші айналымында қазақстандық боксшы венесуэлалық Мариэлис Ириспен жұдырықтасты. Талай додаларда жүлде алып, бокс мамандарын мықтылығымен мойындатқан отандасымыз венесуэлалық боксшыны еш қиындықсыз жеңді – 5:0. Хальзова келесі кезеңде түркиялық Элиф Гюнермен кездеседі.
Ал кеше былтырғы әлем чемпионатының күміс жүлдегері, 2022 жылғы Азия чемпионы 48 килодағы Алуа Балқыбекова, 57 килодағы Карина Ибрагимова, 63 кило салмақтағы Аида Әбікеева, 60 килода жұдырықтасатын Римма Волосенко және 66 кило салмақтағы Надежда Рябец кезекті жекпе-жектерін өткізді.
А.Балқыбекова ресейлік Юлия Чумгалаковамен, К.Ибрагимова әзербайжандық Махсати Хамзаевамен, А.Әбікеева қытайлық Ченьгю Янмен жұдырықтасса, Р.Волосенко сербиялық Наталья Садринмен, Н.Рябец доминикандық Мари Моронт Эрнандеспен қолғап түйістірді.
