– Әуе қатынасы үлкен сұранысқа ие, серпінді дамып келе жатқан саланың бірі. Жолаушылар және жүк ағымын ұлғайту, қызмет сапасын жақсарту үшін әуежайдың жаңа терминалын салу жөнінде шешім қабылданып, құрылыс жұмыстары жүргізілуде. Ғимарат Болат Өтемұратов қорының қаржысы есебінен салынады. Ал әкімдік әуежайдың сыртқы инженерлік-коммуникациялық инфрақұрылымын жетілдіріп, терминал аумағын абаттандыратын болады. Жаңа терминалда жолаушыларға халықаралық стандарт талаптарына сай барлық жағдай қарастырылған. Аталған жоба өңіріміздің әлеуметтік-экономикалық дамуына оң әсерін тигізіп, әуе көлігі қызметін халықаралық деңгейге жеткізуге, авиациялық қауіпсіздікті күшейтуге, жаңа әуе бағыттарын ашуға мүмкіндік артады, – деді облыс әкімі Нұрлыбек Нәлібаев.
Жаңа басталған құрылыс басында қоғам қайраткерлері Биғали Қаюпов пен Ибрагим Әбибуллаев жақсы бастамаға жолашар тілек айтты. Нысан пайдалануға берілген кезде көлік саласының көрсеткіштері бірнеше есе артады. Қазір жылына 1400 рейс орындалса, 2025 жылға қарай бұл сан екі есе ұлғаяды. Жолаушы саны 260 мыңнан 500 мыңға жетеді. Ал жүк тасымалы 150 тоннадан 300 тоннаға дейін артады деп болжануда.
Құрылыс кезінде 600-ден астам адам жұмыспен қамтылса, аяқталғаннан кейін 64 жаңа тұрақты жұмыс орны ашылады.
ҚЫЗЫЛОРДА
