Наурыз мерекесінің қарсаңында кәсіпорынның 50 қызметкері өз үйінің кілтін алды. Олардың қатарында көпбалалы және толық емес отбасылар, сондай-ақ өндірістегі негізгі және өнеркәсіптегі ерек мамандық иелері де бар.
– Металлургтер «Отбасы банк» АҚ-ның ERG мамандары үшін арнайы әзірленген бірегей бағдарламасы бойынша – бастапқы жарнасыз әрі жалдау-жинақтау тетігімен пәтер алды. Алғашқы 8 жыл ішінде қызметкерлер ең төменгі жалдау ақысымен осы пәтерлерде тұрады. Осы кезеңде олар «Отбасы банкіндегі» депозиттерінде пәтер құнының 50% -ын жинақтауға тиіс. Бұл шарт орындалған кезде, пәтер құнының қалған 50%-ын «Отбасы банк» оларға жылдық 3,5%-тен 5% мөлшерлемемен тұрғын үй займы ретінде бермек. Содан кейін баспана компаниядан сатып алынады. Бұл пәтерлердің құны бүгінгі нарықтағы баспана бағасынан едәуір арзан, дейді білетін мамандар.
«Қазақстандық электролиз зауыты» АҚ бас директоры Андрей Батраченко құтты қоныс иелеріне пәтер кілттерін табыстап, жұмысшыларды ұлық мереке – Ұлыстың ұлы күнімен құттықтап сөз сөйледі.
– Наурыз – жыл басы. Осы көктемгі мейрам қарсаңында біздің қызметкердің өз шаңырағына кіріп, үйлі болып жатқаны қатты қуантады. Қызметкерлердің өмір сүруіне қолайлы жағдай жасау – компанияның әлеуметтік саясатының ажырамас бөлігі. Біз олардың өмірін ұдайы жақсартуға тырысамыз. Көптен бері кезек күтіп, пәтер кілтін бүгін алғандардың барлығына жаңа баспанада бақ пен береке орнасын деп тілеймін, деді ол.
– Жұмыс берушінің мұндай қолдауы баспаналы болуға талпынғандарға үлкен үміт сыйлайтыны анық. Біз кәсіпорындармен бірлесіп азаматтардың тұрғын үй мәселесін жедел шешуге ықпал етеміз. Ал бұл жұмыс беруші тарапынан әлеуметтік пакетті күшейтудің тағы бір амалы, деді қуаныш жиынына қатысқан «Отбасы банк» АҚ Павлодар облыстық филиалының директоры Талғат Баилов.
Он қабаттан тұратын ғимарат қаланың ең жақсы аудандарының бірінде орналасқан. Жақын маңда жолайрық бар. Инфрақұрылымы жақсы. Жайлы өмір сүруге қажет нәрсенің бәрі таяқ тастам жерде. Мектептер, балабақшалар мен ауруханалар тіптен тиіп тұр екен.
Зауыт ұстасы – Елмұрат Пармановтың төрт баласы бар. Ол көпбалалы отбасы ретінде баспаналы болып жатыр. Зауыттың іргетасы қаланған сәттен бері осында жұмыс істейді. Алдымен оның құрылысына қатысса, бүгінде сүйікті кәсіпорнынан баспана алды.
– Мен сияқты отбасылар үшін тамаша мүмкіндік. Осы бағдарламаға қатысу бақытына ие болғанымызға өте қуаныштымын. Бұған дейін біз қала маңындағы ауылда жалдамалы үйде тұруға мәжбүр болдық. Енді «Өз үйім – өлең төсегім бар». Балаларым Наурыз мейрамы қарсаңындағы атаулы сыйлыққа ерекше қуанышты. Енді үш бөлмелі пәтерде олардың әрқайсысының кең де жайлы өз орны болады, деді ұста.
Ал тұрғын үй бағдарламасының шарттары отбасы бюджетіне салмақ болмайды. Алғашқылардың бірі болып пәтер кілтін алған қойма және қосалқы жұмыстар цехының қоймашысы, ерлі-зайыптар Мөлдір Әбжанова мен Бауыржан Дерменов те қуанып жатыр. Бауыржан зауытта электр-газбен дәнекерлеуші болып қызмет етеді.
– Зауыт менің және отбасым үшін тек жұмыс орны ғана емес. Кәсіпорын менің жеке тұлға ретінде де, кәсіби маман ретінде қалыптасуым үшін септескен үлкен ұстахана. Мұнда мен жан жарыммен таныстым, ал бүгін пәтердің кілтін алдым. Ендеше, Ұлыстың ұлы күнінде ерекше бақыттымыз, деді қуанышын жасырмаған Мөлдір Әбжанова.
Соңғы екі жылда «Отбасы банкі» арқылы Еуразиялық топ қызметкерлеріне 485 пәтер сатылған. Оның 79-ы «Қазақстандық электролиз зауыты» металлургтеріне бұйырған. Осындай игі бағдарламаларды жүзеге асыра отырып, ERG қызметкерлерін тұрғын үймен қамтамасыз ету жалғаса бермек.
Ал «Отбасы банк» өз кезегінде азаматтарды қолжетімді және сапалы тұрғын үймен қамту жөніндегі мемлекеттік саясаттың мақсаттарын үзбей орындай беруді басшылыққа алған.
