Ұлттық өнерді жаңғырту мен өркендету мақсатында «Алтын адам» Жетісу шеберлері орталығы көп жұмыс атқарды. Бұған дейін Текелі қаласы мен Панфилов, Кербұлақ, Ақсу аудандарынан филиалын ашқан орталық, былтыр Текелі қаласынан мүмкіндігі шектеулі жандардың қолөнерін дамытатын «Мамания» мектебінің шеберлік орталығын құрған еді. Енді, міне, кезек Сарқан қаласына да келіп жетті.
– Қашанда жаңа идеялар мен бастамаларға аудан әкімдігі тарапынан қолдау танытып келеміз. Әсіресе қоғамның әлсіз тобы есептелетін көпбалалы аналар, мүмкіндігі шектеулі жандарды жігерлендіретін бастамалар болса, қуана құптаймыз. «Алтын адам» Жетісу шеберлері орталығы «аудан орталығынан мүмкіндігі шектеулі жандарға ұлттық өнерді үйретіп, олардың жасаған, тіккен бұйымдарын жұртқа көрсетіп, елге қызмет, қамкөңіл жандарға демеу берсек» деген өтініш түскен соң, аудан әкімімен бірге мұқият қарап, бұл ұсынысқа көмектесуді жөн көрдік. Сонымен аудандық Мәдениет үйінен кең де жарық әрі жұмыс істеуге қолайлы орын дайындап бердік. Енді осы жерде аудандағы қолөнерге қызығатын жастар шеберлерден тәлім алып, өздерінің өнерін шыңдап, жұртқа қызмет ететін болады, – деді Сарқан ауданы әкімінің орынбасары Алмас Ажарханұлы.
Ұсыныстарының осылай тез шешілгеніне ризашылығын білдірген «Алтын адам» Жетісу шеберлері орталығының төрайымы Динара Бәкірова аудан басшыларына алғысын білдіріп, орталық құрылғаннан бергі 2 жылда атқарған жұмысына есеп беріп, алдағы жоспарларымен таныстырды.
Осы ретте «Алтын адам» Жетісу шеберлер орталығының Сарқан аудандық филиалының төрайымы Кенжетай Тазабекова жергілікті қолөнершілердің қазіргі күннің бәсекелестігіне төтеп, республикалық, облыстық байқаулар да топ жарып жүргенін тілге тиек етті. Сол қатарда көпбалалы ана, жас қолөнерші Назигүл Батырханқызының шеберлігін айрықша атап кетті.
Жетісу облысы
