Мемлекет басшысы бұған дейінгі Жолдаулары мен ауқымды жиындарда айтып келгендей, адами капиталды дамытуға ерекше мән беретінін байқатты. Адам капиталын дамыту – экономикалық өсудің факторы. Қоғамдағы әлеуметтік қамту салаларымен бірге мәдениет, әдебиет, білім мен ғылым қатар дамуы керек. Ұстаздарымыздың мәртебесін әрі қарай арттыру керек деп айтты. Бұл – өте маңызды мәселе. Бұған дейін мұғалімдер мәртебесі туралы заңның қабылдануына орай педагогтердің құқықтары мен жауапкершіліктерін айқындап алдық. Халықтың ұстаздарға деген құрметі өсіп, мұғалімдердің ел арасындағы бедел, абыройы ұлғая түскеніне куә болдық. Дәл осындай заңды енді медицина саласының қызметкерлеріне қатысты әзірлеу керектігін де тапсырды. Бұл ұсыныстар нақтылай айтқанда отандық әлеуметтік саланы дамытуға, адам ресурстарын жетілдіруге бағытталып отырғаны анық. Адам капиталының сапасы артады. Екінші тұрғыдан, қоғам арасында талқыға түсіп келе жатқан тақырыптардың шешімі табылады. Емделушілер мен дәрігерлер арасындағы байланыс коммуникациялары, әдептері түзіледі деген сөз.
Тағы бір айта кетерлігі, сонау 1999 жылы алынып тасталған «Қазақстанның Халық әртісі» атағын мәдениет саласына қайтару осы сала өкілдерінің шығармашылығына шабыт сыйлап, талпыныстарына түрткі болмақ. Мұндай жоғары атақты тек үздіктер ғана иеленіп, олардың өнері жас ұрпақты шабыттандырады.
Жаңа Парламенттің құрамындағы 28 депутат бұған дейінгі шақырылымдарда болған азаматтар. Олар өзіне сеніп тапсырылған міндетті жалғастырып, тәжірибесі аз әріптестеріне қолдау жасауы керек. Мемлекет басшысы заң шығарушы органның алдына айтарлықтай міндеттер мен бағыттар белгілеп берді. Енді соларды ретімен орындап, Әділетті Қазақстан құру жолына жұмылса абзал. Енді бір жарты жылдан кейін Мәжілістің жұмысы жайында белгілі бір қорытындылар жасауға болады деген ойдамын.
Дәурен ҒАЗИЗ,
С.Торайғыров университеті саясаттану ғылымдарының магистранты
