Басты парыз
Елбасы Нұрсұлтан Назарбаев елорданың денсаулық сақтау саласын заманауи озық технологиялармен қаруланған, жоғары өркениет талаптарына сай сапалы қызмет көрсететін деңгейге көтеру мақсатында реформаторлық міндеттерді жүзеге асырды. Бүгінде Астана қаласының медицинасы қала тұрғындарының ғана емес, бүкіл қазақстандықтардың денсаулығын сақтау мақсатында кешенді қызмет көрсетеді. Біз астаналықтардың сұранысы мен қазақстандықтар мүддесі жолында тың бастамаларға ұйытқы болып отырған елордалық денсаулық сақтау мекемелерінің жұмысымен танысу мақсатында қалалық денсаулық сақтау басқармасының басшысы Айгүл Сегізбаеваны әңгімеге тартқан едік.
– Айгүл Кимқызы, Астана қаласында бүгінгі заманның озық технологияларымен жабдықталған клиникалар кешені жеткілікті. Қалалық денсаулық сақтау жүйесіне жататын мекемелер және олардың материалдық-техникалық базасы хақында айтып өтсеңіз.
– Мемлекет басшысының тікелей қамқорлығының арқасында астаналық денсаулық сақтау саласы бүгінгі өскелең талаптарға сай жабдықталуда. Қазір елорданың денсаулық сақтау құрылымында 34 медициналық ұйым жұмыс істейді, олардың ішінде 11 емхана, 14 аурухана, 1 медициналық жедел көмек көрсету стансасы, 2 білім беру және басқа мекемелер бар. Бұл медициналық ұйымдар жетекші әлемдік өндірушілердің заманауи құрал-жабдықтарымен, соңғы үлгідегі медициналық технологиялық жүйелерімен жабдықталған. Олар сырқатты тексеру мен жедел де жоспарлы тәртіптегі емдеудің кез келген заманауи түрлерін жүргізуге мүмкіндік береді.
– Астаналықтарға медициналық қызмет көрсетудің көлемі мен сапасы туралы не айтасыз?
– Қазіргі таңда, Астана қаласы тұрғындарына тегін кепілдендірілген медициналық көмек шеңберінде амбулаториялық-емханалық кешенде және стационарда амбулаториялық-емханалық, кеңестік-диагностикалық, арнайы медициналық және жоғары мамандандырылған көмек түріндегі медициналық қызмет көрсетіледі. Көрсетілетін медициналық қызметтің сапасын арттыру және қолжетімділігін қамтамасыз ету мақсатында осы жақында елордада №10 қалалық емхана ашылып, ол өз кезегінде медициналық-санитарлық алғашқы көмек (бұдан әрі – МСАК) ұйымдарының жүктемесін 2,5-тен 1,4-ке төмендетуге септігін тигізді.
2013 жылдың қараша-желтоқсан айларында №1 перинаталдық орталық және №2 қалалық балалар ауруханасының базаларында қолданыстағы «Шипагер» және «Ниет» жалпы тәжірибелік дәрігерлер бөлімшелерінің орнына ауысымына 250 және 150 келушілерді қабылдайтын отбасылық денсаулық сақтау орталығы (бұдан әрі – орталықтар) ашылды. Орталықтар қаланың жаңа әкімшілік орталығы, Пригородный, Тельман, Заречное және Промышленный тұрғын алаптарының 55 мыңнан астам тұрғындарына қызмет көрсетуге есептелген. Сонымен бірге, Астана қаласының 800 мыңдай тұрғынына мемлекеттік 11 МСАК ұйымдар және мемлекеттік емес 4 МСАК ұйымы медициналық қызмет көрсетеді.
Емханаларға келетін адамдардың кезек күтіп, көп тұрып қалуына жол бермеу, олардың келуін оңтайландыру, тұрғындарға қызмет көрсету уақытын қысқарту, операторлардың жұмыс істеу сапасын арттыру, медициналық қызмет көрсету сапасын жақсарту мақсатында №5, №8 және №10 қалалық емханалардың тіркеу бөлімдерінде электронды кезекке тұру жүйесі енгізілген.
– Айгүл Кимқызы, елордадағы міндетті тегін медициналық қызмет деңгейі қандай және ол тұрғындар сұранысын қанағаттандыра ма?
Тегін медициналық көмектің кепілдік берілген көлеміне (бұдан әрі – ТМККК) мыналар кіреді:
- жедел медициналық көмек пен санитариялық авиация;
- амбулаториялық-емханалық көмек, ол: МСАК; медициналық-санитариялық алғашқы көмек маманының және бейінді мамандардың жолдамасы бойынша консультациялық-диагностикалық көмекті қамтиды;
- МСАК маманының немесе медициналық ұйымның жолдамасы бойынша стационарды алмастыратын медициналық көмек;
- қалпына келтіру емі және медициналық оңалту;
- Қазақстан Республикасының Үкіметі белгілеген халық санаттары үшін паллиативтік көмек және мейірбике күтімі.
ТКМК шеңберінде тегін медициналық көмек инфекциялық, әлеуметтік-мағынадағы аурулармен және қоршаған ортадағы адамдарға зиянын тигізетін аурулармен ауыратын науқастар үшін көрсетіледі. Қазіргі уақытта Астананың өсіп өркендеуіне байланысты халықтың жоғары миграциясы орын алуда. Астана қаласы халқының жыл сайынғы өсімі 35-40 мың адамды құрап, ол өз кезегінде медициналық көмек көрсетуде кейбір қиыншылықтарды тудырып, емханалардағы жүктемені өсіріп отыр. Солай бола тұрса да, күні бүгінге дейін елордалықтар және МСАК ұйымдарына тіркелген халық белгіленген көлемдегі тегін медициналық көмекпен қамтамасыз етілген. Қажет болған жағдайда азаматтарға тұрғын жері мен азаматтығына қарамастан медициналық көмек көрсетіледі.
– Қалалық медициналық мекемелерінде бүгінгі заманның озық технологиялары қалай жұмыс істейді? Жалпы, Астана қаласының атына сай медициналық салада қандай озық ғылыми жетістіктер бар?
– Елордада қазіргі заманғы технологиялармен жабдықталған жаңа заманауи клиникалардың ашылуымен халықаралық стандарттарға сәйкес диагностика мен емдеудің заманауи әдістерін енгізуге қол жеткізілді. Ол елорданың медицинасын дамытудағы барлық ғылыми ағымдарын біріктіруге және адамгершілік мақсатқа қол жеткізу үшін әлемдік ғылымның барлық жетістіктерін пайдалануға мүмкіндік берді. Қазіргі кезде жақын, алыс шетелдердегі әріптестермен ынтымақтастық және тәжірибе алмасу мақсатында өткізілген шеберлік-сыныптары арқасында трансплантологияны дамыту мүмкін болды. Қалалық ауруханада бір-бірімен туыс адамдардың бауырын трансплантациялау бойынша ота және тірі донордан алынған бүйректі ауыстыру бойынша 3 ота жасалды. Омыртқа және ірі буындарға күрделі де заманауи ота түрлерін жасау қалыпты құбылысқа айналды.
№2 қалалық ауруханада кардиологиялық интервенция мен кардиохирургияның дербес қызметі жұмыс істейді. Мұнда 1800-1900-ға дейін қан тамырлы ангиография, 400 стенттау және жылына 350 ашық кардиохирургиялық ота жасалады. Бұл шаралар қаламызда жүрек-қан тамырлары ауруларынан болатын өлімді 2 есеге дейін азайтты. Бөлімшенің арсеналында қажетті жоғары мамандандырылған құрал-жабдықтың барлық түрлері бар. Сонымен бірге, қалалық денсаулық сақтау саласында Инсульт орталығы жұмыс істейді. Ол халықаралық стандарттарға сәйкес инсульттан кейінгі бірінші сағатта тромболизисті терапияны қолданады.
– Жедел жәрдем стансасы талапқа сай ма?
– 2011-2015 жылдарға арналған «Саламатты Қазақстан» мемлекеттік бағдарламасы аясында халық денсаулығын сақтау деңгейін, оның ішінде жедел жәрдем саласын жетілдіру бойынша нақты міндеттер қойылған болатын. Ел Президентінің Қазақстан халқына Жолдауында да халық денсаулығын сақтау деңгейін арттыру қажеттілігінің атап өтілгені баршамызға белгілі.
Астана қаласының Қалалық жедел медициналық жәрдем стансасында күн сайын шамамен 75 жедел медициналық көмек бригадалары халыққа қызмет көрсетеді. Денсаулық сақтау ұйымдарының үлгі штаты мен штат нормативіне сәйкес, бір жедел жәрдем автомобилі 10 мың тұрғынға қызмет көрсетуге тиіс. Астана қаласы халқының саны 2014 жылдың басында 814 435 адамға жеткенін ескере отырып, жергілікті бюджет қаражаты есебінен қосымша тағы 7 санитариялық жедел жәрдем автомобилін сатып алуға мемлекеттік сатып алу конкурсы жүргізілгенін атап өтуді орынды деп санаймын.
Қазіргі кезеңде жедел медициналық жәрдем стансасында арнайы мамандандырылған дәрігерлік бригадалар толық жабдықталған. Ал фельдшерлік бригадалардың жабдықталуы 82 пайызды құрап отыр. Осыған байланысты, ағымдағы жылдың соңына дейін фельдшерлік бригадалардың жабдықталуын 100 пайызға жеткізу күн тәртібіне қойылды. Сонымен бірге, 2011 жылы 4 қазанда Астана қаласының әкімі Иманғали Тасмағамбетовтің қатысуымен өткен мәжілістің хаттамасын орындау мақсатында, 2012 жылдың қаңтар айынан Астана қаласының Қалалық жедел медициналық жәрдем стансасында «Е-жедел жәрдем» жобасы енгізіле бастады. «Е-жедел жәрдем» жобасы жергілікті бюджеттен бөлінген қаражатпен қаржыландырылып, қолданыстағы жедел жәрдем автомобильдеріне GРS-навигациясы бар планшеттік құрылғылар орнатылды. Нәтижесінде жедел медициналық көмек бригадаларының жұмыстарында оң өзгерістер байқалды. Мысалы, жедел медициналық көмек бригадалары 2011 жылдың 1 айында 9579 шақыртуды қанағаттандыра алса, «Е-жедел жәрдем» жобасы енгізілгеннен кейін осы көрсеткіш 12 433-ке жетті.
– Айгүл Кимқызы, емдеу орталықтарының білікті кадрлармен қамтамасыз етілу жайы қалай?
– Астана қаласының денсаулық сақтау басқармасына 34 медициналық ұйымдарда 8165 медициналық қызметкер жұмыс атқарады. Оның ішінде дәрігерлер 2986, орта буын қызметкерлері 5179 бірлікті құрайды. Бүгінгі күні дәрігерлердің 43 пайызының және мейіргерлердің 41 пайызының жоғары, бірінші және екінші санатты біліктіліктері бар. Өткен жылы жүргізілген аудиттің нәтижесінде штаттық бірлік бойынша медициналық кадрдың тапшылығы – 1070 адамды құрады. Оның ішінде 2013 жылдың қорытындысында дәрігерлер бойынша тапшылық – 635 штаттық бірлікті, орта медициналық мамандардың жетіспеушілігі 855 адамды құрады. Кадр тапшылығын шешу мақсатында кешенді жұмыстар атқарылуда. Сондай-ақ, Астана, Семей, Алматы, Қарағанды қалаларының мемлекеттік медициналық университеттерімен меморандумдар жасалған.
– Қалалық денсаулық сақтау жүйесінің таяу болашақтағы жоспарлары туралы не айтасыз?
– Елорданың денсаулық сақтау саласын дамыту мақсатында ең алдымен, Денсаулық сақтау министрлігі алға қойған мақсат пен міндеттерді іске асыру, оның ішінде амбулаториялық-емханалық буын деңгейінде ДСБҰЖ қағидаларын іске асыру және одан әрі жетілдіру қажет. Медициналық қызметтің сапасын арттыру, қаланың жедел стационарлық мекемелерінде ауруды қабылдау бөлмесінің жұмыстарын жетілдіру, қалалық денсаулық сақтаудың педиатриялық қызметін дамыту бойынша кешенді іс-шараларды жүзеге асыру, ана мен баланы қорғауға бағытталған шараларды жетілдіру және әлеуметтік маңызы бар аурулардың салдарынан болатын өлім-жітімді төмендету қалалық денсаулық сақтау саласы мамандарының алдында тұрған кезек күттірмес басты міндет болып саналады.
– Әңгімеңізге рахмет.
Әңгімелескен
Жылқыбай ЖАҒЫПАРҰЛЫ,
«Егемен Қазақстан».