Үкімет агроөнеркәсіп кешеніне жыл соңына дейін 50 млрд. теңге инвестиция тартуды жоспарлап отыр. Бұл туралы айтқан Экономика және бюджеттік жоспарлау министрі Ерболат Досаевтың мәліметіне қарағанда, саланы қаржылық сауықтыру бағытында соңғы үш айда 170 млрд. теңгеден астам сомаға 172 қарыз алушының өтінімдері мақұлданған. Бүгінгі таңда мұнда 13 млрд. теңгені құрайтын 20 инвестициялық жоба пайдалануға берілген.
Қазақстан жыл аяғына дейін экспортқа 10 мың тонна жоғары сапалы ірі қара етін жөнелтеді. Ауыл шаруашылығы министрі Асылжан Мамытбеков жобаның 2011 жылы Елбасы тапсырмасына сәйкес жасалғанын, оның 2012 жылдан бері жүзеге асырылып келе жатқанын жеткізді. «Қазіргі кезге 1 мың 350 тонна ет экспортқа жіберілді», деді ол.
Алматы қаласында еліміздегі тұңғыш түнгі веложарыс өтеді. Астана күніне орай ұйымдастырылғалы тұрған шараны қала әкімдігі қолға алды. Түнгі веложарыс 4 шілде күні кешкі сағат 22:00-де Әл-Фараби даңғылы мен Тәттімбет көшесінің қиылысынан басталады.
Шығыс Қазақстанда сүт өңдеуші кәсіпорындарға 467 млн. теңге қаржы бөлінеді. «Агробизнес-2020» бағдарламасы шеңберінде қолға алынған бұл қанатқақты жоба шикізат бағасының қымбаттығына байланысты туындаған проблемаларды шешуге көмектеседі.
Қызылорда облысының прокуратурасы биылғы 5 айда алаяқтық дерегімен 452 қылмыстық іс қозғады. Бүгінде бұлардың 191-і сотқа жіберілген. Облыстық прокуратура баспасөз қызметінің баяндауынша, 114 фактіде алаяқтар «несие алуға көмектесемін» деп жұртты алдаса, 75-інде қолжетімді бағамен ипотекалық несие алып беруге уәде еткен.
Павлодарда жалға берілетін тұрғын үй құрылысы басталды. «Қазақстан Ипотекалық Компаниясы» ИҰ» АҚ жалпы алаңы 9 457,92 шаршы метрлік көп пәтерлі тұрғын үй құрылысын қаржыландырады. Жайлылығы төртінші класты 9 қабатты тұрғын үйді қаржыландырудың жалпы сомасы 870 млн. теңгені құрайды.
Қостанай облысында төртінші рет жастар күні аталып өтті. Оған маусым айының соңғы үш күні арналды. Орталық стадионда керуен керген шеруге спортшылар, әншілер, педагогикалық жасақтар, жастар ұйымдарының және ірі өнеркәсіп орындарының қызметкерлері қатысты.
«ҚазАқпарат»,
Аltaynews.kz, Аlau.kz, Egemen.kz агенттіктері сайттарының деректері бойынша дайындалды.