![Шымкентте 3 жасар бала көлікке арналған сұйықтық ішіп қойған](/media/2023/03/31/vlcsnap-2023-03-30-16h45m49s470-747x420.jpg)
Қазір анасымен бірге ауруханада жатқан 3 жасар Арман білместіктен тежегішке арналған сұйықтық ішіп қойған. Бала бірден ауырып, ата-анасы дабыл қағып, жедел жәрдем шақырған. Бүлдіршін ауруханаға жатқызылды. Дәрігерлер сәбидің ауыз қуысы, өңеші және асқазаны қатты күйіп қалғанын анықтады.
«Менің күйеуім көлік жөндеуші, сондықтан бұл сұйықтық үйде болды. Ал менің балам оны абайсызда ішіп қойған», дейді баланың анасы.
Дәрігерлер де балаға қатты токсикалық улану диагнозын қойған. Емдеуден кейін сәбидің жағдайы жақсарып, палатаға ауыстырылды.
«Бала бізге екі күн бұрын келді. Қазір бактерияға қарсы препараттар, түрлі жақпа майлар алып, ем қабылдап жатыр», дейді Гипербарикалық оттегімен қамтамасыз ету орталығының токсикологы Марат Кәкенов.
Ал жуырда сірке қышқылын ішкен 5 жасар бала ауыр халде гиперборлы оттегімен қамтамасыз ету орталығына түскен. Оның аузы және өңеші күйіп қалған, бірақ қазір бала өз бетімен тамақтанып жатыр, жағдайы қанағаттанарлық.
Дәрігерлер ата-аналардан каустикалық сұйықтықтарды балалардың қолы жетпейтін жерде сақтауды сұрайды.