Анадолы елінде Қазақстанның намысын 19 балуан қорғады. Олардың арасынан тек Нұрқанат Серікбаевқа ғана (60 кг) жүлдегерлер қатарынан көріну бақыты бұйырды. Жарыстың іріктеу бәсекелерін В тобынан бастаған 2022 жылғы жастар арасындағы Азия чемпионы Нұрқанат Серікбаев алғашқы белдесуінде моңғолиялық Цогт-Очир Бьямбаджавты жеңсе, екінші айналымда әлем чемпионатының екі дүркін қола жүлдегері, 2014 жылғы Азия ойындарының үшінші орын иегері оңтүстіккореялық Вон Джин Кимді жарыс жолынан ығыстырды. Ал ширек финалда жастар арасындағы Еуропа чемпионы әзербайжандық Назир Талибовтан басым түскенімен, жартылай финалда украиналық Дилшод Халматовтан айласын асыра алмады.
Ал қола жүлде үшін өткен белдесуде моңғолиялық Энхтайвани Ариунболдты 1 минуттың ішінде таза әдіспен жеңіп, қола медальды мойнында жарқыратты. Бұл – Нұрқанаттың «Grand Slam» жарыстарындағы екінші жүлдесі. Ол осыған дейін Ташкентте өткен әлемдік додада күміс жүлдегер атанған болатын. Сондай-ақ 60 килода өнер көрсеткен тағы бір отандасымыз Шерзод Давлатов 7-орынға табан тіреді.
Сонымен қатар 66 кило салмақта белдескен Ғұсман Қырғызбаев пен 100 килода сынға түскен Нұрлыхан Шархан жүлделі орындарға сынық сүйем қалғанда сүрінді. Ғ.Қырғызбаев қола медаль үшін болған белдесуде бразилиялық Виллиан Лимаға голден-скорда есе жіберсе, Н.Шархан хорватиялық Боян Досеннан жеңіліп қалды.
Өзге отандастарымыздың нәтижелеріне тоқталар болсақ, Есет Қуанов (66 кг), Дархан Қойбағаров (73 кг), Руслан Мұсаев, Абылайхан Жұбаназар (81 кг), Айдар Арапов (90 кг) үшінші айналымға дейін жетсе, Данияр Шамшаев (73 кг), Дидар Хамза (90 кг), Бекарыс Сәдуақас (100 кг), Ғалымжан Қырықбай (+100 кг) және Әділ Оразбаев (+ 100 кг) алғашқы айналымда сүрінді.
Ал әйелдер арасында 70 килода белдескен Анастасия Маякова екінші, Ғалия Тынбаева (48 кг), Бақыт Құсақбаева (57 кг), Роза Нысантаева (70 кг) және Кәмила Берліқаш (+78 кг) бірінші айналымнан аса алған жоқ.
