Оқушылардың «Имплантталатын кардиостимуляция және дефибрилляция жүйесі» атты жобасы Астанада өткен байқауда I орынды жеңіп алды. Жобаны сәтті қорғаған Алдиярға Қазақстан-Британ техникалық университетінің гранты бұйырды. Оның айтуынша, құрылғы аурудың түрін бірден анықтайды. Содан соң жүрекке соған орай электр импульсін жібереді. Ол импульстер жүрекке күш бермек.
– Біздің құрылғы тері астына бекітіліп, ал электродтар жүрекке қан тамырлары арқылы орнатылады. Құрылғы аурудың түрін дереу анықтап, электр импульстерін жібереді. Бұл импульстер жүрек бұлшық еттеріне оның жұмысын тежеп не жеделдету арқылы әсер етеді, – дейді ол.
Мұндай кардиостимуляция және дефибрилляция жүйесі жүректің тахикардия, брадикардия, жүрек қарыншасының фибрилляциясын емдеуге көмектеседі екен.
Биомедицина, инженерия және технология байқауына алты секция бойынша 100-ге жуық жоба қатысқан. Соның арасында қарағандылық оқушылардың тағы бір жобасы – «Ақылды» протездер және олардың элементтері. Экзо және эндопротездеу» үздік деп танылды. Сонымен қатар Қарағандыдағы NIS оқушысы Ұлан Мұстафин «Адам ағзасының функционалдық жай-күйін мониторингілеуге арналған аппараттық-бағдарламалық құралдар» секциясында үшінші орын иеленді.
Жалпы, бұл байқауға қарағандылық білімпаздар бес жоба ұсынған екен. Оның арасында «Аяқ-қолдары әртүрлі адамдарға арналған роботталған табан», «Сіңдіру әдісімен біріктірілген дәрілік гидрогель», «Бүкірлікпен күресуге арналған Postrue құрылғысы және мобильді қосымша» жобалары да бар.
ҚАРАҒАНДЫ
