Ұлттық жобалар аясында – 5 мың, бос жұмыс орындарына – 22 мың, жеке бастамалар аясында 17 мың адам екі қолға бір күрек тапса, кәсіпкерлікті дамытудың Ұлттық жобасы арқылы – 31 мың, оның ішінде субсидияланатын жұмыс орындарына 5 мыңнан аса аймақ тұрғыны орналаса алады. Мұның сыртында 1,5 мың адам қысқа мерзімді курстардан білім алады. Онда жұмыс берушілердің сұранысымен 481 адам бар. Ал Skills Enbek платформасы арқылы мыңнан аса адам жаңа кәсіп меңгермекші. Бүгінде 7 мың адам жұмыспен қамтуға қатысты түрлі шараларға жұмылдырылған. Оның 6 мыңға жуығы жұмысқа орналасыпты.
Жұмыспен қамтуды үйлестіру және әлеуметтік бағдарламалар басқармасының басшысы Әсем Жүніспекованың айтуынша, жастар кәсіпкерлігін дамыту мақсатында жаңа тетік қолданылады. Бұл – жылдық пайызы 2,5% жеңілдетілген несие.
– Жастар кәсіпкерлігін дамыту үшін биыл жаңа тетік – жылдық 2,5% жеңілдікпен несиелеу енгізіліп жатыр. Соның ішінде аймақта 324 несиеге бөлінген қаржы көлемі – 1,6 млрд теңге. Ең жоғары сома – 5 жыл мерзімге 5 млн теңге. Ал мал шаруашылығындағы жобалар үшін 7 жылға дейінгі мерзім қарастырылған. Мұнда кепілге қояр мүлік – басты талап. Құжаттар мен бизнес-жоспар Аграрлық несие корпорацияның филиалына ұсынылады. Несие беру туралы шешімді комиссия қабылдайды, дейді басқарма басшысы.
Бұған қоса әлеуметтік осал топтағы тұрғындардың да кәсіпкерлікпен айналысуына қолайлы мүмкіндік бар. Бұл – тың жобаларға тапсырылатын грант. Мысалы, биыл Қарағанды облысында бизнес-идеяларды іске асыруға 190-нан аса грант берілмекші. Жалпы, сомасы 263 млн теңгеден асып жығылады. Қазіргі кезде олар 49 грант алды.
«Күміс жас» жобасындағы өзгерістерге байланысты бұл жобаға енді 50 жасқа толған азаматтар да қатыса алады. Бұрын бағдарлама 58 жастан асқан адамдарды ғана қамтып келген еді.
Облыстағы жұмыссыздарды жеке көмекші және әлеуметтік қызметкер мамандықтарына оқыту жоспарланып отыр. Осыдан кейін олар зейнеткерлікке шыққанға дейін кемінде бір жыл, ал зейнеткерлікке дейінгі жастағы (58 жастан асқан) адамдар тұрақты жұмыс орнына орналасады.
«Жастар тәжірибесі», «Бірінші жұмыс орны» және «Ұрпақтар келісімшарты» жобаларында еңбекақы мөлшері 30 АЕК-ке дейін ұлғайғаны мәлім. Бұл жобаға қатысу мерзімі – 12 айға дейін.
– Кадр мәселесін шешу үшін «Қуатты өңірлер – ел дамуының драйвері» ұлттық жобасының өңіраралық еңбек ұтқырлығы аясында облысқа жұмыскерлерді тарту бойынша жұмыс жүргізіліп жатыр. Бүгінгі таңда Түркістан облысымен бірлесіп, өзара міндеттемелер туралы меморандум жасалды. Облыс жұмыс берушілерімен Түркістан облысында бос жұмыс орындары жәрмеңкесі өткізілді, дейді басқарма басшысы.
Өңірдің өзінде де кәсіпорындарға халықтың қолжетімділігін көздеген бос жұмыс орнының жәрмеңкесі ұдайы ұйымдастырылады. Сонымен қатар жұмыс орындары мен жұмыспен қамту бағдарламалары туралы тұрғындарға кеңес беретін мобильді топтар жұмыс істейді.
Қарағанды облысы
