Халықаралық көрме нысандары

белгіленген мерзімінде әрі сапалы салынып бітуі тиіс Кеше Президент Нұрсұлтан Назарбаев Астана қаласының жаңа нысандарын көру барысында «Астана ЭКСПО-2017» көрме кешенінің құрылысымен танысты. Елбасы барады деген соң, құрылыс басына әдеттегідей журналистер де жиналдық. Ол жерде қазақстандық қана емес, кәдімгі халықаралық ірі шаралардағы­дай шетелдік журналистердің қарасы да көп екен. Әрине, бұл төрткүл дүние көз тіккен ха­лықаралық көрме емес пе, елі­міздің дайындығын білмекке бәрінің де ынтасы зор. Әлбетте, ЭКСПО-ға әзірлігімізді әлемге та­ратпаққа асық. Біз барғанда күннің аздап жаңбырлы болғанына қара­мастан, құрылыс басы абыр-сабыр, қызу жұмыс жүріп жатты. Құрылысшылар көрмекке келгендерді де кедергі көрер емес, өзіне берілген міндетін мінсіз орындауға ұмтылып, бар ынтасымен жұмысқа кіріскен. Себебі, олардың алдында ел жүктеген үлкен жауапкершілік, Елбасы міндеттеген тиісті тапсырма тұр. Тарсыл-гүрсіл дыбыс, түрлі техника тықылы... Кейбірінің қабырғасы қылтиған құрылыс нысандары, одан қалды қазыққа қамдалған теп-тегіс жер, жаңбырға жіпсіген лайлы топырақ... Әрине, енді үш жылдан соң ғана дәл осы жер жарқыраған ғажайып қалашыққа айналатынына біреу сенсе, біреу сенбес. Себебі, та­қыр жерден қала тұрғызу әсте оңай шаруа ма?! Алайда, ол мүмкін нәрсе. Оған бүгінгі ажа­ры айшықты жаңа Астана ай­ғақ. Осыдан 10-15 жыл бұрын ғана бос жатқан сол жағалауға қа­зіргі әсем Астана аспаннан тү­се қалған жоқ, әрине! Оған еліміз күш-қуатының, әлеуметтік-экономикалық әлеуетінің жететіні күмәнсіз. Бұған кеше Елбасына «Астана ЭКСПО-2017» Ұлттық компаниясының басшысы Талғат Ермегияевтің берген есебі де дәлел болатындай. Сонымен, Мемлекет басшысы «Астана ЭКСПО-2017» көрме кешенінің салыну барысын көріп шыққан соң, құрылыс барысына арнайы салынған мәжіліс залы, баспасөз орталығына келіп, құрылысты жүргізіп жатқан компания басшылары, мемлекеттік органдардың өкілдері, жалпы «Астана ЭКСПО-2017» көрме кешенінің құрылысына қатысты барлық жауапты тұлғаларды жинап, мәжіліс өткізді. Құрылыстың жай-жапсары жайында есептерін тыңдады. Нысандардың электронды нұсқадағы нобайларын көріп, кешеннің келешектегі келбетін келісті етуге ақылдасты. Елбасына есеп беруді алдымен «Астана ЭКСПО-2017» Ұлттық компаниясының басшысы Талғат Ермегияев бастады. Еске салсақ, «Астана ЭКСПО-2017» ҰК» АҚ Үкіметтің 2013 жылғы 15 қаң­тардағы қаулысымен құрылған болатын. Компания қызметінің негізгі мақсаты ЭКСПО-2017 ха­лықаралық мамандандырылған көрмесіне дайындық жасау және оны өткізу болып табылады. Астанада ЭКСПО өткізу үшін Қазақстан «Болашақтың энергиясы» тақырыбын ұсынған. Ха­лық­аралық көрмелер туралы кон­венцияға сәйкес, ЭКСПО-2017 көрмесі 3 айға, яғни 2017 жылдың 10 маусымынан 10 қыркүйегіне дейін созылады. ЭКСПО-2017 халықаралық мамандандырылған көрмесінің павильондарының негізгі құ­ры­лымдарын салу 2015 жылдың қазан айына қарай аяқталады, деп атап өтті Т.Ермегияев. 2015 жылдың қазан айында па­вильондар ішіндегі әрлеу жұ­мыс­тары басталмақ. Ал орта­лық көрме павильонына қа­тыс­­ты әрлеу жұмыстары 2016 жыл­­дың желтоқсан айында аяқ­­талады. Сондай-ақ, ол келер жыл­дың қазан айында халық­аралық павильондардың негізгі құ­рылымдарының құрылысы аяқталады дегенді айтты. Сонымен қатар, ЭКСПО-қала­шықтың «нөлдік кезеңін» құ­ры­лысшылар кестеден ерте аяқ­тауды жоспарлап отыр екен. Бастапқы кесте бойынша «нөлдік кезеңнің» аяқталуы 2014 жылдың желтоқсанына жоспарланыпты. Т.Ермегияевтің сөзіне қарағанда, қазіргі таңда жоспарланған құ­ры­лыс-монтаждау жұмыстары кес­теге сәйкес толық көлемде жүргі­зілуде. Ұлттық компания басшы­сы­ның мәліметінше, Халықаралық көрмелер бюросының талабына сәйкес, Қазақстан көрмені ұйымдастырушы ел ретінде халықаралық қатысушылардың тұрғылықты жерлерін қамтамасыз ететін болады. Қонақтарға 1300 пәтер қарастырылған. Жалпы, құрылыс жұмыстарына 300 техника мен 700 құрылысшы жұ­мыл­дырылған. Кешеннің жалпы ауданы – 173,4 гектар. Ал көр­ме аймағы – 148,5 гектар. Құ­рылыс 2014 жылғы 24 сәуірде басталған болатын. Көрме аймағы құрылысының негізгі нысандары – Қазақстанның Ұлттық павильоны, халықаралық, тақырыптық және корпоративтік павильондар, сондай-ақ, сауда және ойын-сауық ғимараттары. «Астана ЭКСПО-2017» Ұлт­тық компаниясы басшысының сө­зінен соң, Елбасына құрылысқа жауапты компаниялар өкілдері – «Sembol Uluslararasi» басқармасы төрағасының орынбасары Феттах Тамеджи, Mabetex президенті Африм Пакколи, BI-Group хол­дингінің басшысы Айдын Ра­хым­баев, «СК Базис» ЖШС бас директоры Александр Белович, «AstanaGroup» компаниясының президенті Нұрлан Смағұлов, «Орталық Азия жылу-энерге­тикалық компаниясы» АҚ дирек­торлар кеңесінің төрағасы Александр Клебанов, «Астана LRT» басқарма төрағасы Ардан Талғат, «Қазақстан темір жолы» ҰК» АҚ президенті Асқар Ма­мин өздеріне тиісті жауапты жұмыстардың атқарылу барысы жайында есеп берді. Есеп берушілермен пікір­лескен және сұрақ-жауап түрінде өткен басқосу барысында Елба­сы кешеннің құрылысына жауап­ты басшыларға ЭКСПО қала­шығының маңыздылығын айта отырып, онда айрықша ескерілу тиіс мәселелерге тоқталды. Көр­мені өткізу Астана қаласының ғана емес, бүкіл Қазақстанның да­муындағы маңызды кезең екенін атап өтті. – Бұл – әлемдік ауқымдағы ірі іс-шара. Бүкіл әлемге өз мүм­кін­діктерімізді көрсету үшін сіздерге, мердігерлерге оның дайындығына қатысуға сенім білдірілді. Сіздер өз қабілеттеріңізді өзге нысандарда дәлелдедіңіздер. Отандық компаниялар, сондай-ақ, біздің елімізде жұмыс істеген шетелдік мердігерлер бұған дейін ешқашан ұятқа қалдырған емес, қазір де бәрін уақытында және сапалы атқаруы тиіс, – деді Мемлекет бас­шысы. Бұл ретте Қазақстан Пре­зи­денті бірінші кезектегі міндет – «нөлдік циклды» қазан айына қа­рай аяқтау екенін, бұл құрылыс жұмыстарын қысқы мау­сымда да жүргізуге мүмкіндік беретінін айтты. Нұрсұлтан Назарбаев уақыт­тың тығыздығына, соған орай кестені қатаң сақтау қажеттігіне де тоқталды. ЭКСПО-қалашығының құрылысы қазақстандық компаниялар үшін ынталандыру болып табылатынын да назарға салды. Бұл ретте «Сіздердің барлығыңызға, мердігерлерге бүкіл әлем алдында біздің мүмкіндігімізді дер уақытында әрі сапалы көрсету үшін ЭКСПО-қалашығының құрылысы сеніммен тапсырылып отыр. Мен барлықтарыңызды да білемін. Басқа нысандарда сіздер дәлелдедіңіздер. Бұл – сіздер үшін өзіндік бір сый тарту әрі ынталандыру. Біз құрылыс саласында кәсібиліктерін дәлелдеген мүлдем басқа құрылысшыларды да шақыра алар едік. Олар да қалаған болатын әрі барлығы өті­ніш берген еді», – деді Мем­лекет басшысы. Елбасының атап өтуінше, көрме қалашығын салу ісінде қазақстандық және елі­мізде жұмыс істеп жатқан ком­па­нияларға сенім арту дұрыс шешім болып отыр. Мемлекет басшысы, со­ны­мен қатар, барлық ғимарат­тар­дың көрме біткеннен кейін пайда­ла­ны­луының маңыз­ды­лығын тағы бір рет еске салды. – Бастапқыда қонақүй қыз­метін атқаратын барлық ғима­рат­тар кейін баспана ретінде пай­да­ланылуға тиіс. Бұл – көр­ме аумағында салынған бар­лық ғылыми, сауда және басқа да орталықтарға қатысты мәсе­ле. Көрме үшін салынған ғима­рат­тары кейін пайдаланылмай қалған өзге елдердің қателігін қайта­лауға жол беруге болмайды. «Астана ЭКСПО-2017» Ұлт­тық компаниясы осыны қадаға­лауы тиіс, – деді Қазақстан Пре­зиденті. Бұған қоса, қаланың барлық тұрғындарын дайындап, қонақтарға қызмет көрсету саласын жақсарта түсу қажет. Нұрсұлтан Назарбаев қаланың көрмені өткізуге толық дайын болып, отандық бай мәдениетті таныту арқылы қонақтарға жоғары қызмет деңгейін көрсетуі тиіс екенін де айтып өтті. Сонымен қатар, Мемлекет басшысы көрменің дайындығы мен оны өткізуге бөлінетін қара­жаттың жұмсалуын жіті бақылау қажеттігіне де назар аударды. Динара БІТІКОВА, «Егемен Қазақстан».