«KAZsport» арнасына – 1 жыл

Жақында Астанада «KAZsport» телеарнасының ашылғанына бір жыл толуына байланысты мерекелік шара өтті. Оған грек-рим күресінен Олим­пиада және әлем чемпионы Жақсылық Үшкемпіров, аты аңызға айналған гимнасшы, Олимпия ойындарының бес дүркін чемпионы Нелли Ким, Олимпиаданың екі дүркін және әлемнің үш дүркін чемпионы, Қазақстанның еңбек сіңірген спорт шебері Илья Ильин және басқа да танымал спортшылар қатысып, «KAZsport» телеарнасын «туған күнімен» құттықтады. Осы күні «Қазақстан» РТРК мен Спорт және денешынықтыру істері агенттігі арасында ынтымақтастық туралы меморандумға қол қойылды. Құжатқа «Қазақстан» РТРК атынан басқарма төрайымы Нұржан Мұхамеджанова, агенттік тарапынан ведомство төрағасының орынбасары Елсияр Қанағатов қол қойды. Енді меморандумға сәйкес еліміздің спорттық өмірі жөнінде хабарлар тарату, спорт түрлері мен саламатты өмір салтын кеңінен насихаттау, телеарнаның телеөнімдерін арттыру бағытында ынтымақтастық байланыс орнатпақ. Осыдан тура бір жыл бұрын, 2013 жылдың 1 шілдесінде «Қа­зақ­стан» республикалық теле­ра­дио­корпорациясының негі­зінде елімізде тәулігіне 21 сағат хабар тарататын тұңғыш «KAZsport» телеарнасы жұмыс істей бастады. Арнайы мамандандырылған телеарна Елбасы Н.Назарбаевтың тапсырысы бойынша құрылды. «KAZsport» – Еуропаның «Eurosport», «Спорт 1», «Спорт плюс» телеарналарымен тең дәрежеде хабар тарататын Орталық Азияда теңдесі жоқ спорт телеарнасы. Бір жыл ішінде «KAZsport» телеарнасының көрермендері тікелей эфирден спорт түрлерінен 2000-ға жуық трансляцияларды тамашалады. Шетелдердің барлық спорт шараларында телеарнаның түсірілім топтары жұмыс істеді. 12 ай ішінде «KAZsport» аты аңызға айналған спорт қаһар­мандары, спорт түрлері бойынша командалар жайында 36 деректі фильм түсірді. «Где вы, чемпионы?» циклы шеңберінде 87 бағдарлама түсіріліп, эфирге берілді. Мұның барлығы күн сайын эфирге шығатын жаңалықтар мен арнайы репортаждармен толығып отырды. «KAZsport» сонымен қатар, әлемдік тәжірибені де енгізуде. Алғаш рет отандық теледидар тарихында «KAZsport» телеарнасының комментаторлары оқиға орнында – Бразилияда футболдан әлем чемпионаты өтіп жатқан стадиондарда жұмыс істеуде. Аталмыш тәжірибе болашақта да жалғасын табады. Биылғы телемаусымда телеарна Англияның премьер-лигасын, Жазғы Азия ойындарын, жасөспірімдер арасындағы Олимпиаданы, Алматы­да өтетін ауыр атлетикадан әлем чемпионатын және тағы да басқа спорт шараларын көрсетуді жоспарлап отыр. «KAZsport» телеарнасының туған күніне орай бірнеше ірі жоба әзірленді. Соның біреуі – аты аңызға айналған гимнасшы, Олимпия ойындарының бес дүркін чемпионы туралы түсірілген «Наша Нелли Ким» деректі фильмі. «KAZsport» телеарнасы отандық теледидар тарихында алғаш болып атақты чемпион туралы өмірбаяндық фильм түсірді. Арнайы түсірілім тобы АҚШ-та, оның Шымкенттегі алғашқы спорт мектебі мен Алматы қаласында болып қайтты. Н.Кимнің қатысуымен деректі фильмнің тұсаукесері 1 шілде күні «Kinopark 7IMAX 3D» («Керуен» сауда орталығы) өтті. Дастан КЕНЖАЛИН, «Егемен Қазақстан».