31 жастағы Солтүстік Қазақстан облысының тумасы бұған дейін де өз жанкүйерлерін талай рет қуантқан еді. Елмира 2016 жылы Бразилияның Рио-де-Жанейро қаласында алауы тұтанған Олимпия ойындарында қола медальді мойнында жарқыратты. 2018 жылы Жакартадағы Азия ойындарында да дәл сол межеден көрінді. 2014-2021 жылдар аралығында өткен құрлық чемпионаттарында 1 алтын, 2 күміс және 3 қоланы қоржынға салды. Ол басқа да көптеген халықаралық турнирде топ жарды.
Астанадағы жарыста Сыздықова Жақсылық Үшкемпіров атындағы жекпе-жек сарайына жиналған жұртты теңдессіз өнерімен тамсандырды. Алғашында өзбекстандық Озода Зарипбоеваны айқын басымдықпен жеңсе, іле-шала қытайлық Жуан Ванды оңай еңсерді. Финалда оның жолы Айпері Медетқызымен қиысты. Қырғыз қызы қандасымыздан алты жас кіші. Оның үстіне, Медетқызы соңғы кездері халықаралық аренада толағай табыстарға қол жеткізіп жүр. Атап айтсақ, Жакартадағы Азия ойындарында, Белградтағы Әлем кубогінде және Ослодағы әлем чемпионатында үшінші тұғырға көтерілді. Соңғы үш құрлық біріншілігінде жүлде алды. Мәселен, 2020 жылы Нью-Делиде, 2021 жылы Алматыда күміспен күптелсе, 2022 жылы Ұланбатырда алдына жан салмады.
Көршілес екі елдің белді балуандары ұзақ уақыт тіресті. Екеуі қанша тырысса да, бір-бірін ала алмады. Бәсеке бел ортадан ауған тұста қарсыласының сәл босаңсыған сәтін сәтті пайдаланған Елмира оны жерге алып ұрды да, үстіне қона кетті. Айпері қауіпті жағдайдан құтылудың барлық амалын жасады. Бірақ ол қазақ балуанының темір құрсауынан шыға алмады. Сөйтіп, Елмира Сыздықова Азия чемпионы атанды.
55 кило салмақтағы Марина Седнева жартылай финалда моңғолиялық Отгонтуя Шинболдтан ұтылғанымен, қола медаль үшін тартыста шеберліктің шынайы үлгісін көрсетті. Төреші белгі берген бетте бірден шабуылдаған ол бірнеше ұпай еншіледі. Вьетнамдық Ти Мю Транг Нгуен де осал емес екен. Ол да лезде лайықты жауап қайтарды. Бәсекенің басталғанына небәрі 30 секунд өткенде таблодағы есеп 9:6-ға жетті. Сол мезетте Марина оңтайлы тәсілін жүзеге асырып, қарсыласының аяғын көктен келтірді. Нәтижесі – таза жеңіс және қола медаль.
Жанкүйерлер 68 кило салмақ дәрежесінде күш сынасқан Елена Шалыгинаның бозкілемге шыққан сәтін тағатсыздана күтті. 36 жастағы ардагер спортшы кезінде Олимпия ойындары мен үш бірдей әлем чемпионатында жеңіс тұғырына көтерілген. Азия чемпионаттарында 2 алтын, 2 күміс және 1 қоланы еншілеген.
Шалыгина Астанадағы жарысты жеңіспен бастады. Бірақ ширек финалда өзінен 15 жас кіші, жалындап тұрған жас жапониялық Ами Ишийге әлі жетпеді. Шыны керек, үшінші орын үшін тартыста да біз жерлесіміз жеңілетін шығар деп ойладық. Өйткені бұл межеде оның жолы Токио Олимпиадасы мен Азиаданың қола жүлдегері, әлем чемпионы, Әлем кубогінің иегері, құрлық чемпионы Мейірім Жұманазаровамен қиысты. Осы атақтың барлығына қырғыз қызы 23 жасқа толмай-ақ қол жеткізді. Бірақ Мейірімнің жарақат алуына байланысты бәсеке мерзімінен бұрын тоқтатылып, жеңіс Елена Шалыгинаға берілді.
Осылайша, әйелдер күресінен өткен жарыстың алғашқы күнін Қазақстан құрамасы 1 алтын және 2 қола медальмен қорытындылады. Біздің балуандар арасынан Эллада Махяддинова (50 кило) мен Диана Каюмова (59 кило) ел сенімін ақтай алмады.
