Кеше Астанада Тәуелсіз Мемлекеттер Достастығына қатысушы мемлекеттер Қорғаныс министрлері кеңесінің (ТМД ҚМК) кезекті отырысы өтті. Оның жұмысына Әзербайжан, Армения, Беларусь, Қазақстан, Қырғызстан, Ресей, Тәжікстан, Өзбекстан қорғаныс ведомстволарының делегациялары қатысты.
Достастық шеңберіндегі әскери ынтымақтастықтың көпбейінді сипатын ескере отырып, Кеңес мүшелері өзара іс-қимылдың жалпы перспективаларын және оның басым бағыттарын айқындаудың тұжырымдамалық көзқарастарын талқылады.
Отырыста күн тәртібіне сәйкес, Достастық мемлекеттері қорғаныс ведомстволары көпжақты әскери ынтымақтастығының түрлі аспектілері бойынша 20-ға жуық мәселе қаралды. Қорғаныс министрлері, атап айтқанда, инженерлік әскерлер әскери қызметшілерінің гуманитарлық минасыздандыру міндеттерін орындау кезеңіндегі мәртебесіне, радиациялық, химиялық және биологиялық ахуалды бақылау және бағалау жүйесін дамытуға, әскери мақсаттағы спутниктік байланыс жүйелерін пайдалануға, Достастық елдері қарулы күштеріндегі ұшулар қауіпсіздігіне қатысты құжаттарды қарады.
Сонымен бірге, әскери ынтымақтастықты тереңдету аясында әуе шабуылына қарсы қорғаныс, әскери білім, әскери-қолданбалы спорт түрлері, сондай-ақ, кадрлық және қаржылық қамтамасыз ету салаларындағы басымдық берілген зерттеулерді жүзеге асыру мәселелері қаралды.
Отырыстың қорытындысы бойынша әскери-техникалық, әлеуметтік-құқықтық және гуманитарлық салалардағы өзара іс-қимылды әрі қарай нығайту жөніндегі құжаттар қабылданды.
* * *
Қазақстан Республикасының Қорғаныс министрі Серік Ахметов ТМД-ға қатысушы мемлекеттер Қорғаныс министрлері кеңесінің отырысы шеңберінде Ресей қорғаныс ведомствосының басшысы Сергей Шойгумен кездесті. Кездесу барысында Қазақстан мен Ресей арасындағы әскери және әскери-техникалық салаларда әрі қарай өзара іс-қимыл жасау мәселелері бойынша пікір алмасылды.
Тараптар ТМД пішінінде көпжақты әскери ынтымақтастық жүйесін жетілдірудің, әскери саладағы интеграциялық үдерістерді дамытудың маңыздылығын атап өтті.
Кездесу соңында ҚР ҚМ мен РФ ҚМ арасындағы 1994 жылғы 19 қазандағы ҚР ҚК мен РФ ҚК әскери аэродромдарында қабылдауды ұйымдастыру, аэродромдық-техникалық қамтамасыз ету және әскери әуе кемесін күзету туралы келісімге өзгертулер енгізу туралы хаттамаға қол қойылды.
Жақсыбай САМРАТ, «Егемен Қазақстан».
