Конкурстың алдында ұйымдастырылған баспасөз конференциясында облыстық мәдениет және спорт басқармасының басшысы Мира Қазбекова бұл конкурс бастауын 2006 жылдан алатынын айтып өтті. Алғаш рет сол жылы композитордың 60 жасқа толуына орай ұйымдастырылған өнер сайысы аймақтық деңгейде өтті. Кейін әр 2 жыл сайын республикалық дәрежеде өтіп, талай дарынды жастардың өнердегі жолын ашқан ән бәйгесі биыл алғаш рет халықаралық ауқым алып отыр.
Байқау шарты бойынша Қазақстаннан қатысатын талапкерлер бірінші кезеңде Кеңес Дүйсекеевтің бір әнін, екінші кезеңде халық әндері немесе Қазақстан композиторларының бір туындысын орындады. Шетелдік әншілер алғашқы кезекте композитор әнін, келесі кезеңде өз елінің шығармарын айтты.
Олардың өнеріне жергілікті композитор, Қазақстанның еңбек сіңірген қайраткері Рамазан Тайманов, Литва елінің белгілі продюсері Бируте Петриките, болгариялық маман Николай Текелиев, Қазақстанның халық әртісі Нағима Есқалиева, композитор Бейбіт Оралұлы, халықаралық конкурстар мен фестивальдер ассоциациясының мүшесі Қарлығаш Әбдікәрімова және композитордың ұлы Нұркен Дүйсекеев баға берді.
Аймақ басшысы өз сөзінде Қызылорда облыстық филармониясына Кеңес Дүйсекеев есімі берілетінін атап өтті. Дарынды өнер иесі туған өңірде былтыр 1000 орындық «Өнер орталығының» іргесі қаланған еді. Биыл қолданысқа берілетін орталықта концерттердің кәсіби әрі жанды дауыста көрерменге жол тартуына септігін тигізетін симфониялық оркестрдің де тұсауы кесіледі, Ұлттық өнерге өлмес туындылар қосқан талант атындағы конкурста «Үміт» аталымымен Кенже Майлыбай марапатталса, өзбекстандық Мұса Молдабаев «Көрермен көзайымы», тағы бір жергілікті әнші Ақылбек Табынбаев «Туған жер» аталымын иеленді.
Конкурстың үшінші орны алматылық Алмагүл Батталиеваға, шығыс-қазақстандық Кәмила Талғатова мен болгариялық әнші Славея Ивановаға берілді. Екінші орын жүлдесі астаналық Айдын Жұмабаевқа, Ақтөбе қаласынан келген Азамат Бекбергеновке, қырғызстандық Абай Серіковке бұйырды. Бірінші орын иегерлері болып ақтөбелік «Тамсан» триосы мен Польша әншісі Михал Качмарек танылды.
Қазылар алқасының шешімімен Сыр елінде тұңғыш рет халықаралық деңгейде ұйымдастырылған конкурстың бас жүлдесі атыраулық әнші Дана Мәжитоваға тапсырылды.
Қызылорда облысы
