Үй ішінен үй тікпек болып, сепаратизмді насихаттағандарға қатысты мәселе қоғамда үлкен дау туғызған еді. Осыған байланысты облыстық полиция департаменті мен Ұлттық қауіпсіздік комитеті департаментінің тергеушілерінен жедел-тергеу тобы да құрылды. Кеше Солтүстік Қазақстан облыстық прокуратурасы өткізген брифингте «Халық кеңесі» деп аталған топтың үш белсендісінің қамауға алынғаны айтылды.
«Сепаратизмді насихаттады деп күдікке ілінген топтың үстінен екі қылмыстық іс қозғалды. Іс Қылмыстық кодекстің 180-бабы 2-бөлігі бойынша Қазақстан Республикасының біртұтастығы мен тұтастығын ыдыратуды насихаттау немесе оған жария түрде бұқаралық ақпарат құралдарын және телебайланыс желілерін шақыру арқылы материалдарды тарату және Қылмыстық кодекстің 179-бабы бойынша мемлекеттің қауіпсіздігін ыдыратуды үгіттеу бойынша сарапталған. Бұл ауыр қылмыстар санатына кіреді. Оған 10 жылға дейінгі мерзімге бас бостандығынан айыру түріндегі баламасыз жазалау қолданылады. Топтың негізгі үш фигуранты уақытша ұстау изоляторына қамауға алынды», деді Солтүстік Қазақстан облысы прокуратурасы басқармасының бастығы Ғани Жалби.
Саясаттанушы мен басқа да мамандар қатысқан комиссиялық психологиялық-филологиялық сот сараптамасы бейнежазбадан сепаратизм белгілерін анықтап, қорытынды шығарды.
«Тергеу барысында Петропавл қаласында 2023 жылғы 19 наурызда Солтүстік Қазақстан университеті колледжінің ғимаратында облыс орталығының 20 азаматынан тұратын «Халық кеңесі» деген топтың жиналыс өткені, олар өздерін «Кеңес социалистік республикалар одағының ізбасарларымыз» деп, көзқарастарын білдіргендігі анықталды. Жиынға біреуі кәмелет жасына толмаған баласымен келген. Қалған 16 адам жұмыстарынан шеттетілген жоқ, қызметтерін жалғастырып жатыр. Олар бойынша шешім қабылданған жоқ. Кінәсі дәлелденген жағдайда жазаға тартылады. Тергеу барысы қатаң бақылауда. Кімнің қайда жұмыс істейтіні туралы, қалай бұл топқа қосылғаны туралы ақпарат Қылмыстық-процестік кодекстің 201-бабына сәйкес әзірге жариялауға жатпайды. Қазіргі уақытта тергеу әрекеттері жалғасып жатыр, жиналысқа қатысқан басқа тұлғаларға қатысты объективті және жан-жақты құқықтық баға беріледі», деді Ғани Жалби.
Естеріңізде болса, наурыздың аяғында әлеуметтік желіде «Халық кеңесі» деп аталатын топтың видеосы кең тарап, қоғам наразылығын туғызған еді. Осыған байланысты Ұлттық қауіпсіздік комитетінің Солтүстік Қазақстан облысы бойынша департаменті сепаратизм фактісі бойынша сотқа дейінгі тергеп-тексеру бастаған болатын. Сол күні облыс прокуратурасының нұсқауы бойынша Ұлтық қауіпсіздік комитеті, полиция, Экономикалық тергеу департаменті, облыстың Сыбайлас жемқорлыққа қарсы қызмет мамандарынан ведомствоаралық жедел-тергеу тобы құрылып, процестік прокурорлар тағайындалды.
