ФОТО: www.08info.kz
Құланның қоңыр әуенін бойына сіңіріп өскен өнер иесін еске алуға арналған «Сағыныш-2» концертіне келушілердің қарасы қалың. Ретроға айналған Жаңбыршының әндері әдіптелген кешке әр буын өкілдері жиналып-ақ қалыпты. Арасында жасы алпысты алқымдап қалған ұстаздың оқушылары да бар...
Алатау баурайындағы Көкдөнен ауылында белгілі композитор Мэлс Өзбековпен бірге өнер сапарына қатар шыққан таланттың екеуі де бүгінде арамызда жоқ. Алайда жүректерге жарық сәуле түсіріп кеткен композитор әндері Мэлс Өзбеков атындағы мәдениет үйінде жиі шырқалады. Шын өнердің өлмейтінін композитордың лирикалық әндерін тыңдағанда түсінесің.
Ауылда жүріп-ақ «Таң самалы» ансамблін құрған Жаңбыршы Үсейіновтің «Құдаша», «Ағайындар», «Досыма хат» секілді өзге әндері өнерсүйер қауымның жүрегіне жетті.
Марқұмның қызы, әріптесіміз Ардақ Үсейінова әкесінің әндерін қатардағы концерттегідей әншілердің бірінен соң бірін орындауына мүмкіндік бермеді. Студенттерден құралған актерлік құрам әр әннің тарихын қойылым түрінде жеткізіп жатты. Көңілді ауыл кеші, ауыл адамдарының мінезі, тапқырлығы, аңғалдығы секілді қасиеттер жас актерлердің шеберлігі арқылы көрерменге дөп жетті. Жас режиссер Дарын Дауымовтың шешімдері де көкейге қонды.
Концерт барысында Жаңбыршы Үсейіновтің «Досыма хат», «Жастығымның жалыны», «Жігіт сыры», «Ағайындар», «Сағыныш» секілді лирикалық әндерін жас әншілер жетер жеріне жеткізе орындады. Әлбетте, композитордың бірді-екілі әнін жас таланттармен бірге шырқаған, колоратуралық сопрана дауысты әнші Гаухар Мырзахметова көпшіліктің қошеметіне бөленді.
Сахнадағы актерлердің қимылы, киім киісі, жүріс-тұрысы, тіпті биіне дейін ретролық сипатта болғаны қуантты. Сол арқылы біз сазгер ғұмыр кешкен уақыттың тынысын сезіндік. Концерт соңында композитордың замандастары мен іні-қарындастары бірінен кейін бірі сахнаға шығып, «Сағыныш-2» кешінде өнер иесіне деген сағыныштарын ақтарып жатты. Қысқасы, сағыныш сазымен әдіптелген ән кеші құландық өнерсүйер қауымға ұнағаны анық.
Жамбыл облысы,
Тұрар Рысқұлов ауданы
